InfoHub Logo

Nurlan Noǵaev kásipkerlerdi adaldyqqa shaqyrdy. Bul týraly Atyraý óńiriniń basshysy búgin, 20 jeltoqsanda ótken jumys otyrysy barysynda aıtty. Keńes barysynda oblystyń ekologıalyq jaǵdaıy, sonyń ishinde qaraýsyz qalǵan munaı uńǵymalary máselesi sóz boldy, — dep Atyraý oblysy ákiminiń baspasóz qyzmeti habarlaıdy.

“Aımaqta jer qoınaýyn paıdalanyp otyrǵan kásipker óz isine adal bolýy kerek. Eń bastysy halyqqa paıdasyn tıgizý baǵytynda jumys isteýi qajet”, - dedi aımaq basshysy.

Aıta ketelik, buǵan deıin  Atyraý oblysyndaǵy “Kúmisbek” ken ornyndaǵy eki uńǵymadan munaı tógilip, tabıǵatqa zıan kelip jatqany aıtylǵan edi. Ken ornyn qytaılyq úlesi bar “Kóljan oıl” kompanıasy paıdalanyp kelgen. Alaıda jyl basynda fırmamen kelisimshart merzimi aıaqtalyp, kompanıa uńǵymalaryn qaraýsyz tastap ketken.

“Kúmisbektegi” qaraýsyz qalǵan uńǵymalardy óz aqshamyzǵa biteýge májbúr boldyq. Al buǵan jaýapty tulǵalar baılanysqa shyqpaı otyr.  Bul, túptep kelgende, olardyń halyq aldyndaǵy jaýapkershiliginiń joqtyǵy. Sebebi, bul – halyqtyń jeri”, - dedi Nurlan Noǵaev.

Aımaq basshysy  qaramaǵyndaǵylarǵa uńǵyma aınalasyn tazartyp, topyraq qabatyn qalypqa keltirý jumystarymen aınalysýdy tapsyrdy.

Aıta ketelik, 2002-2009 jyldar aralyǵynda Atyraý oblysy ákimdigi óz kúshimen qaraýsyz qalǵan 48 gıdrogeologıalyq uńǵymany bitegen. Qazirgi qaraýsyz qalǵan qaýipti munaı uńǵymalaryn anyqtap, solardy tyǵyndaý baǵytynda jumys júrip jatyr.  

 

---