InfoHub Logo

Arman shirkinniń ne ekenin adam ataýly áý bastan bilse de, túr-túsi qandaı ekenin, nemen ólshenetinin bilgen, aıtqan tiri jan joq. Osy meniń... «jynyma tıdi» demeı-aq qoıaıyn, no namysyma tıdi. Sonsoń qolyma túsken-túspegen eski-jańa, arzan-qymbat, qalyń-juqa kitaptardy, árıne, ǵasyr ǵulamalary jazǵandaryn, bir kún, bir tún túp-túgel aqtaryp, «arman» degen aqqýdaı ásem sózdi avtorlardyń eshbiriniń aýzynan taba almadym. Tym bolmasa armannyń túsi appaq ekenin bizdiń aqyndar ǵurly aıtsashy!.. Qanym qaınamaǵanmen, kúlkim keldi. Op-ońaıdy qıyndata salǵyshpyz-aq! Kánekı, men bir armandy ańyrataıyn, ony nemen ólsheýdi men toqtaǵannan keıin keńesermiz. Meniń zaýlatpaǵym – bir aýdan ákiminiń armany.

Oblystyń ákimi Shómshekbaıdyń tańdaýymen aýdan ákimi ataǵyn alǵan Kómirbaı qoǵamdyq mindetin jarty jyl boıy jalyqpaı atqardy da, bir kúni orazasyn armanmen bylaısha ashty: «Ýa, jalǵan dúnıe, sen ótersiń de ketersiń, bilem ǵoı, bilem! Al meniń senimen birge ótkim de, ketkim de kelmeıdi. Mynaý jaryq álemde tirideı ózim qala almasam da, atymdy qaldyrýym kerek! Qashan?.. Qalaısha?.. Ta-a-ak... Álde tarıhı sózderimmen be... áı, ony qoıa turaıyn, ekiniń biri sarqyratyp júrgen sý sóz, burqyratyp júrgen bý sóz eshqaıda qashpaıdy, taýsylyp qalmaıdy, znachıt, men sózden iske kósheıin. Mysaly, men «Aýdannyń ardaqty azamaty» ataǵyn alsam... «Beıbitshilik kóshesi» delingen bas kóshege meniń atym qoıylsa... men turǵan úı «Aýdandyq murajaıǵa» aınaldyrylyp, aldyna gúldi alań jasalyp, onyń qaq ortasyna meniń tik turǵan keskin-eskertkishim ornatylsa... aýdannyń quramyndaǵy on tórt aýyldyń ortalyq kóshelerine meniń atym berilse... meniń aýylymdaǵy bastaýysh mektepke, aýdan ortalyǵyndaǵy onbirjyldyq mektepke meniń atym qoıylsa... e, ıá, aıtpaqshy, - aýyldaǵy mektep alańyna meniń qatty oılanyp otyrǵandaı eskertkishim ornatylsa... zeınetke shyqqanyma deıin qalaıda akademık bolyp alsam... ata-babam, áke-sheshem, aǵa-apaılarym, ózim jaıynda anaý Núrkússhe jazǵysh bireýdi jaldap alyp, árıne, eshkimge bildirmeı, qalyń-qalyń kitaptar shyǵartsam... aqyn ataǵy shyǵa bastaǵan Shúńgilbaımen shúıirkelesip, býyn-býynyn bosatyp, tańdaýly óleńderiniń birine qosymsha avtor aqyn bolsam, Dúńgilbaıdyń tilin taýyp, jańa romanyna qosymsha avtor prozaık bolsam... osylaı isteýim kerek! Oblys ákimderin, qudaıǵa shúkir, asyqsha qaqpaqyldap otyrǵan, maǵan jol ashyp berip júrgen Nákeń aman-esende meniń betime jel tımeıdi, tolko aqyldasyp alyp, tez kirisýim kerek! Kiriser qarsańda qalta máselesin sheship alýǵa tıispin. Eshkimge jaltaqtamas úshin. Birtalaıǵa jeter jınaǵanym bar, áli de jınaı beremin. Mendegideı tórt bólmeli úı, úsh gektar jer, úsh qabat kotej, «Toıoto» men «Aýdı» bar ákim sápsem az. Aı-hoı, shirkino-o-oı, oblystyń oıy men qyryn tegistep taltańdap júrgen mıllıonerlerdiń birimen quda bolsam ǵoı!.. «Qatyn alma, qaıyn al» degen ataly sózdi uqpaı qoıǵan ulyma solardyń biriniń, tipti baıdan qaıtyp kep otyrǵan qyzy bolsa da, alyp bersem... qyzymdy da sondaı bir shylqymaı jerge qondyrsam... sáti túsip, premer-mınıstrmen, prezıdentpen quda bolsam, eh-he-he... eki dúnıede armanym bolmas edi!.. Oǵan deıin parlamentiń senatyna depýtat bola qalsam!..».

Já, aýdanbasynyń áláýláıin osy tusynda toqtataıyn, búıtpesem, háláýláıin eshqaıda, eshnársege syıdyra almaspyn, osynysynyń ózi bir dorba boldy. Iá, bir dorba! Senbegender, pajalysta, ózderi ólshep alsyn!

---