InfoHub Logo

Ózińdi jetildirýdiń, tabysqa jetýdiń joly, eńbekqor, tabysty adamdarmen birge bolý. Sen júgirgenińde, aldyńa túsip seni odan da jyldam júgirýge yntalandyratyn, kúsh-jigerińdi, shamańdy shyńdap, kelesi deńgeıge ótýińdi qamtamasyz etedi. Sondaı-aq tabysqa jetken, tarıhta iz qaldyrǵan zıaly, tabysty adamdardyń ómir baıanyn, júrip ótken jolyn, qıynshylyqtardy qalaı jeńgenin, tabysqa qalaı jetkenin, qandaı jaqsy qasıetteri baryn, aınalasyna qalaı paıdaly bolǵandyǵyn oqyp, sony úlgi etip alý, soǵan uqsaýǵa tyrysý da paıdaly bolyp tabylady. Bıznes trenıńterde jastarǵa osyny aıtyp júretin edim. Bir retinde zaldaǵy jastardan: «Armandaryńa, alǵa qoıǵan maqsattaryńa jetý múmkin, biraq osy jolda ózderińe úlgi bolatyn tulǵa, sonyń izimen júrip jetistikke jetýlerińe sebepshi bolatyn bir qaharman tańdasańdar bolady. Osyndaı úlgi bolarlyq tulǵa retinde sender kimdi atar edińder?» dep suradym. Jastar arasynan bireýi qolyn kóterip: «Gendalf» dedi. Onyń kim ekendigin bilmegendikten bul jaýapqa asa mán bermegen edim. Keıinirek surastyrǵanymda ústime sý quıǵandaı bolyp, álgi jaýapqa ne kúlerimdi, ne jylarymdy bilmedim. Sheteldik fantasıkalyq fılmdegi jamandarmen soǵystaǵy sıqyrshy aqsaqaldy keıipker eken. Jastarymyz rýhanıatyn ulttyq qundylyqtarymyzdan emes, sheteldik qıalı personajdardan alyp jatyr eken ǵoı dep ishim syzdap qoıa berdi. Ómirleri úlgi-ónegege, ǵıbratqa, keremetke toly Qoja Ahmet Iassaýı, Tóle bı, Abylaı han sekildi handarymyz, bılerimiz, sheshenderimiz, tarıhı babalarymyz kóp emes pe? Olardy tanymaı, batystyń qıal týyndysynan shyqqan fılmdegi keıipkerdi úlgi dep ataýy dabyl qaǵarlyq qubylys emes pe? Keń baıtaq jerimizdi jaýlap alynýdan qashanda qorǵaıtynymyz sekildi, balalarymyzdyń sanasynyń jaýlap alýyna da jol bermeýimiz kerek emes pe? Men osy jaýaptan keıin elimizdiń keleshegi balalarymyzǵa tarıhyn, mádenıetin, ulttyq qundylyqtaryn sińire otyryp tárbıe berýdi myqtap qolǵa alý kerek ekendigin jaqsylap uqqandaı boldym.

---