InfoHub Logo

Kúnderdiń birinde muhıt ortasyndaǵy keme apatqa ushyrap sýǵa ketedi. Kemeden bir adam ǵana tiri qalyp, aǵash bólsheginde jatqan adamdy tolqyndar elsiz aralǵa aparyp tastaıdy. Aman qalǵanyna shúkir etken kisi áýelde kómek keler degen úmitpen kókjıekke qaraýmen júredi.

Alaıda eshqandaı kemeniń qarasy kórine qoımaıdy. Keıin jyrtqysh ań men jaýynnan qorǵaný úshin aǵashtar men japyraqtardan shaǵyn úıshik jasaıdy. Jaǵadan tapqan keme qaldyqtary men kompas sekildi kerek jaraqtardy jınap, úıine ákelip alady. Balyq aýlap, azyqtanyp, kúnder kezegimen ótip jatty. Úmitin úzbesten kúnde Allahý ta’alaǵa qutqarýyn tilep, duǵa etip jalbarynýdy toqtatpaıdy. Bir kúni ádettegideı tushshy sý ákelý úshin araldyń ortasyna qaraı ketedi. Qaıtyp kelgeninde ne kórsin?! Myń bir eńbekke salynyp, ishin kerek jaraqqa toltyryp jasaǵan úıi órtenip jatyr eken. Onsyz da qaıǵydan qulazyp júrgende, myna jaǵdaı muń ústine muń qosyp eńsesi odan saıyn túsedi. Osy jabyrqaýly kúıde bir shette jatyp uıyqtap ketedi. Tań aǵara bastaǵanda jaǵaǵa jaqyndap kele jatqan kemeniń gýilinen oıanady. Keme ony qutqarýǵa kelgen eken. Kelgenderden: «Meniń munda ekenimdi qaıdan bildińder?» — dep suraǵanda: «Siz jaqqan sıgnaldyq tútindi kórip keldik», — dep jaýap bergen eken.

Demek unatpaǵan nársemiz biz úshin qaıyrly bolýy, al unatqan nársemiz jaman nátıjemen aıaqtalýy ábden múmkin eken. Biz bilmeımiz, Allah jaqsy biledi.

---