InfoHub Logo

QR Bilim jáne ǵylym mınıstrligi joǵary oqý oryndarynda memlekettik bilim granttaryn ala almaı qalǵan 45 «Altyn belgi» ıegerin tegin oqytý múmkindikterin talqylady.

 Bul ıgi bastamany onshaqty qazaqstandyq JOO rektorlary qoldap, olardyń bólgeli otyrǵan granttyq oryndar sany da belgili boldy.

«Ál-Farabı atyndaǵy Qazaq Ulttyq ýnıversıteti - 10,  Turan ýnıversıteti - 10, E. Bóketov atyndaǵy Qaraǵandy memlekettik ýnıversıteti - 1, Qazaq memlekettik zań ýnıversıteti - 15, Halyq sharýashylyǵy ýnıversıteti - 3, S. Demırel atyndaǵy ýnıversıtet - 2, Abylaı han atyndaǵy Qazaq halyqaralyq qatynastar jáne álem tilderi ýnıversıteti - 1, Almaty menejment ýnıversıteti - 1, sondaı-aq M. Áýezov atyndaǵy Ońtústik Qazaqstan memlekettik ýnıversıteti 2 oryn qamtyp otyr. QR Bilim jáne ǵylym mınıstrligi joǵary oqý oryndarynyń mundaı bastamany qoldap, qoǵamǵa, jumys berýshiler men túlekterge kórsetken áleýmettik jaýapkershilik úlgisi úshin alǵysyn bildiredi»,-delingen QR BǴM málimetinde.

Óıtkeni, úzdik oqyp, UBT barysynda «Altyn belgige» laıyq joǵary bilim deńgeıin rastaǵan mektep túlekteri oqýlaryn tegin jalǵastyrý múmkindiginen aıyrylýy múmkin edi. Ondaı jaǵdaı «Altyn belgi» ıeleriniń básekelestik deńgeıi joǵary,  ári memlekettik tapsyrysy az bólinetin mamandyqtardy tańdaýlarynan týyndap otyr.  Osylaısha, bıyl memlekettik bilim granttaryn ala almaı qalǵan 45 «Altyn belgi» ıegeriniń 19-y ekonomıkalyq, 8-i - halyqaralyq qatynastar, 14-i - zańgerlik, 4-i - aýdarmashylyq mamandyqtaryn tańdaǵan.

Atap aıtqanda, elimizde memlekettik bilim granttarynyń negizgi bóligi eńbek naryǵynda suranysy joǵary, el ekonomıkasyna asa qajetti tehnıkalyq jáne tehnologıalyq mamandyqtarǵa bólinip otyr.

Budan buryn habarlaǵandaı, bilim berý granttaryn berý jónindegi respýblıkalyq konkýrstyq komısıasy jumysynyń aldyn ala qorytyndylary boıynsha «Altyn belgi» medal ıegerleriniń birshamasy memlekettik grant esebinen bilim ala almaıtyndyqtary belgili boldy.  Bıyl 2059 «Altyn belgi» ıegeri oqýyn elimizdiń JOO-da jalǵastyrýǵa nıet bildirdi. Alaıda, olardyń keıbiri básekelestik deńgeıi joǵary qarjy-ekonomıkalyq nemese áleýmettik-gýmanıtarlyq baǵyttaǵy mamandyqtardy tańdaǵan. Olardyń basym  bóligi elimizde sońǵy jyldary ındýstrıalyq-ınnovasıalyq damý basymdyqtaryna kóp kóńil bólinip jatqanyn eskermeı keledi. Bıyl da memlekettik granttardyń kóbi atalǵan basymdyqtardy júzege asyrýǵa, ıaǵnı eńbek naryǵynyń qajettilikterine baǵyttalyp otyr.  

---