InfoHub Logo

Ertede aǵaıyndy eki jigit bolypty. Ákelerinen jastaı aıyrylyp, sheshesi úsheýi ómir súredi eken. Alańdary bolmaı ósken aǵaıyndy eki jigit jastaıynan ań aýlaýdy kásip etipti. Boılary ósip, buǵanalary qata bastaǵan kezde bulardyń ańshylyǵy tóńiregin tánti etetin bolypty. Ásirese túzdiń bóken sıaqty kóp kezdesetin ańyn aýlaýǵa mashyqtanǵany sonsha — ústilerine bóken terisinen tikken jarǵaqtaryn kıip alyp, túz taǵysymen aralasyp júrip qalaǵanyn atady eken.

Kúnderdiń bir kúninde aǵaıyndy eki jigit tize qosyp, ádettegideı bóken aýlaýǵa shyǵady. En dalada synaptaı syrǵyp júrgen bókenniń burylyp kelip sý isher oryndarynyń bolatyny belgili. Sondaı bir bulaqtyń basyna erterek kelgen eki jigit atýǵa urymtal orynǵa bekinbek bolady. Sonda aǵasy inisine aqyl beredi: «Ekeýmiz bulaqtyń eki qabaǵyn ala jaıǵasaıyq. Qatalap kelip sýǵa bas qoıǵan bókendi eki jaǵynan qaqpalap atsaq qaryq bolamyz», — deıdi. İnisi aǵasynyń aıtqanyna kónip, kórsetken jerine bekinedi.

Tús mezgili bolyp, kún tas tóbege kóterilip, tiri jannyń ańqasyn keptirgendeı ystyq kóterilgen kezde múıizi jarq etip, bókenniń sholǵynshy tekesi kórinedi. İle dalanyń shańyn shúıkedeı sozyp, artynan kımeleı keýdelegen eshki-laqtary jetedi. Sol betinde qalyń kıik aınaly astaýdaı jarqyrap jatqan bulaqqa bas qoıady ǵoı. Osy kezde, urymtal sát kelgen shyǵar dep, aǵasy sadaq tartady. Dúr etip keri serpilgen
bókenniń kelesi shetinen ýáde boıynsha inisi de oq jaýdyrady. Talaı bóken oqqa ushady. Ań qyzyǵy aǵaıyndy eki jigittiń delebesin qozdyryp, odan saıyn qunyǵa atady.

Sóıtip, eki ortada uılyǵa jóńkilgen bókenniń tuıaǵynan qalyń shań kóteriledi. Álden ýaqytta aman qalǵan bókender shań arasynan sytylyp shyǵyp, túzge bet alady. Áli de bolsa shań arasynda uılyqqan birer bókendi atyp alyp qalmaqshy bolǵan aǵaıyndy eki jigit qalyń kıikti óksheleı qýyp, sadaq tartady.

Bir mezgilde aǵaıyndy jigitterdiń úlkeni shań arasynan bókenniń oıqastaǵan súlderin kórgendeı bolady. Qylt etkendi qutqarmaı atyp mashyqtanǵan jigit sadaǵyn qulashtaı kerip tartyp jiberedi. Bul joly da atqany qapy ketpeıdi, kózdegenin murttaı ushyrady. Sol betinde baýyzdap ala qoıaıyn dep júgirip kelse, bóken dep atqany óziniń jalǵyz inisi eken deıdi. Sol jerde baýyrynyń basyn qushyp jylaǵan jigittiń zary keıin el ishinde «Bóken jarǵaq» degen kúı bolyp tarasa kerek.

---