InfoHub Logo

Tepeńkók áý basta bir baıdyń qoıǵa salǵan shaban aty eken. Myń salsa bir baspaıtyn shabandyǵyna bola Tepeńkók atansa kerek.

Kúnderdiń bir kúninde taqymynda júrgen Tepeńkókke jurttan asqan bir synshynyń kózi túsedi. Synshy Tepeńkóktiń aldy-artyna shyǵyp, suqtana qarap turyp: «Apyr-aı, osy zamannyń jylqysy azdy ma dep júrsem, joq, meniń kózim tozǵan eken ǵoı. Myna janýar búıirimdi qyzdyrsań, báıgeden kelem dep tur ǵoı!» — deıdi.

Bul sózdi estigen qoıshy: «Bárekeldi, qoıǵa da jete almaıtyn Tepeńkókke qaıdaǵy báıge!» — dep kúledi.

Synshy sol betinde at basyn baıdyń úıine tireıdi. Sóz arasynda synshy: «Baıeke, qyryq jylda bir týatyn eren júırikti qor qylyp, qoıǵa salyp qoıǵanyńyz qalaı?» — dep suraıdy baıdan.

Baı bul sózdi kóńiline alyp, synshy keleke etip otyr-aý degen oımen: «Shyn júıriktiń qyryq jylda bir týatyny ras bolsa, sol qyryq jylda ortaımaıtyn dáýletim bar. Menen júı rik jylqy kórgiń kelse, qyryq jyldan keıin kel!» — dep qyrys qabaq tanytady. Sonda synshy: «Baıeke, kóńilińizge almańyz, men shynymdy aıtyp otyrmyn. Shyqqyr kózim shyqpasa, qoıshynyń astyndaǵy Tepeńkók aldyna qara salmas júıriktiń ózi. Tek, babyn bilmeı júrsizder. Tepeńkók búıiri qyzbaı shappaıtyn, arqasy qozbaı aryndamaıtyn at. Sol úshin, báıgege qosarda eki qorjyn basy qum teńdep alý kerek. Ári-beri shapqan soń qulaǵynyń túbinen ter biliner. Ter bilingen soń-aq Tepeńkóktiń baýyry jazylyp, sozyla shabýǵa tıis. Sol kez de qorjyn túbin ótkir kezdikpen tilip jiberip, qumyn tókse, sonan soń arýaǵyn kótere urandap, aıqaıǵa salyp otyrsa, Tepeńkók saqpannyń oǵyndaı zaýlar edi!» — deıdi.

Synshynyń aıtqan sózine baı qulaq asyp, báıgege qosady. Jaı qospaıdy, aıaqqaptaı ala qorjynǵa qum teńdep qosady. Aıtqanyndaı, sol joly Tepeńkók nebir jelaıaq júırikterge shań qaptyryp, jalǵyz qara bolyp báıgeden kelipti. Osydan keıin baby tabylǵan Tepeńkók báıgeniń aldyn bermeıtin bolypty deıdi.

Myna kúı sol Tepeńkóktiń shabysyn keltirgen, arasynda at ústindegi balanyń urandaǵan aıqaıyn bildiretin kúı eken.

---