InfoHub Logo

Erterekte bir ónerpaz jigit bolsa kerek. Ol kezde jigittiń jaqsysy jylqy baǵyp, júırik minedi. Kúnderdiń bir kúninde, sol ónerpaz jigit saıaq shyqqan jylqylaryn izdep júrip, bir aýylǵa kez bolady. Sol aýylda shetkerirek tigilgen aq boz úı bar eken. Úı syrtynan at baılar mama aǵash kózge shalynǵan soń, kisi túsetin «qonaǵýar úı» bolarsyń dep at basyn burady. Jigittiń oılaǵanyndaı, úı tóńiregi tap-tuınaqtaı, aıaqqa shalynyp jatqan múlki joq. Oımyshtalǵan syqyrlaýyqty jara ashyp úıge kirip kelse oń jaqta bir boıjetken keste tigip otyrsa kerek. Jigit sálem beredi. Qyz lyp etip ornynan turyp, sypaıy ǵana amandasyp, tórge kórpe salady. Jigit tórge ozyp, qamshysyn syrtyna tastap, jaıǵasqan soń, qysqa-qaıyrym tilmen jónin aıtady. Qyz: «E, joq izdep sharshaǵan ekensiz ǵoı, sýsyn, dám qamdaıyn, jaıǵasyp otyra berińiz», — deıdi de, shyǵyp ketedi.

Jigit úı ishine bajaılap kóz salsa, júk aıaqqa súıeýli bir sary dombyra tur deıdi. Qulyqsyzdaý qol sozyp, jaı ǵana dyńǵyrlata bastaıdy. Jol soqty bolyp kelgen jigittiń qunyǵyp tartýǵa zaýqy joq, ásheıin ermek etken syńaıy baıqalady. Muny sol úıdiń boıjetkeni birese qymyz ákelip, birese jastyq tastap júrip baıqaıdy. Jaı baıqap qoımaıdy «dombyranyń berekesin ketirdi-aý» degendeı jymıyp ótedi.

— Qurbym kúlki shaqyrardaı qandaı qylyǵymdy baıqadyń? — dep jigit syr tarta saýal qoıady.

Qyz kúlkisin tyıyp, kerbez qalpymen:

— Joǵa, sizdeı, eldiń sheti, jeldiń ótinde júrgen jigitten min izdeý úıde otyrǵan bizge jaraspas. Min izdegenmen tabylmas. Jáı ásheıin, saırap turǵan dombyranyń tiliniń kúrmelip qalǵanyna kúlgenim ǵoı, — dep sóziniń sońyn ázilge burady.

Kerbez qyzdyń qylyǵyna saı esti sózi, kúmisteı syńǵyrlaǵan úni beı-jaı otyrǵan jigittiń jan dúnıesin baýrap, dúr silkintkendeı bolady. «Ataly sózge arsyz ǵana daý aıtady» degen bar. Esti jigit qyz sózine ishteı uıyp, eńsesin túzeıdi de:

— Á, dombyra tilin túsiner qulaq bolsa, sóıletip kóreıin, — deıdi de bir kúıdi bastaı jóneledi.

Qyz sypaıy ǵana tize búgip, qos janary móldirep, kirpik qaqpaı kúıge den qoıady. Ýyz óńi qubylyp, aq mańdaıy kerilip, kúıdi berile tyńdaǵan syńaı baıqalady.

Kúı tartylyp bitedi. Qyzdyń mamyq tósi dirildep, jeńil ǵana kúrsinedi de:

— Apyr-aı, buryn estimegen syry mol kúı eken, — deıdi.

Sonda jigit:

— Qurbym, kúıdi tartýshy men bolǵanmen, tartqyzǵan óziń, seniń kerbez qylyǵyń. Osy dıdarlasýymyzdyń bir belgisi dep bil. Kúıdiń aty «Kerbez qyz» bolsyn, — degen eken. Sóıtip, eki jastyń kóńilin jarastyrǵan kúı «Kerbez qyz» degen atpen jurtqa jaıylǵan.

---