InfoHub Logo

Baıaǵyda bir elge oba tarap, onyń ústine aq súıek jut bolyp, el túgel qyrylyp, tek bir jigit qaryndasymen ǵana aman qalǵan eken. Jigit ań aýlap, qaryndasy ekeýi ańnyń terisin kıip, etin azyq etip kúneltip júripti.

Shilińgir shildeniń bir kúninde ystyqtamas úshin bóken terisinen kıgen kıimniń júnin syrtyna qaratyp kıip alǵan jigit kúndegi bóken aýlaıtyn bóken jalaqqa tartypty. Ol Bóken jalaqtyń mańyna taıap baryp bóken ańdyp búk túsip jatady.

Osy kezde taǵy bir ańshy jigit bóken aýlamaq bolyp osy mańaıǵa keledi de, búk túsip jatqan bókendi kórip atyp qalady. Ańshy jigit ony baýyzdap almaq bolyp júgirip jetip kelse, bóken emes bir jigittiń jaırap jatqanyn kóredi. Oqys jazaǵa jany ashyp ketken jigit muńaıyp oıǵa ketedi.

«Bul jigit te men sekildi jalǵyz ba eken, álde serigi barma eken? Eger serigi bolsa izdep keler» dep tosyp otyrady. Erteńinde bir qyz kelip jigittiń óligin kórip zar eńirep jylaıdy. Muny anadaıdan kórip otyrǵan jigit qyzdyń janyna kelip:

— Aǵańdy bóken dep men atyp edim, ádeıi atqam joq. Men de jalǵyzbyn, adam balasyn kórmeı dalada júrgenime talaı jyl boldy. Adam ekenin bilsem, búıter me edim! Aǵańnyń ólimine men de armanda qalyp barmaǵymdy shaınadym. Baqıǵa jol alǵan oralmaıdy. Aǵań úshin kegimdi alam deseń, mine qural, meni at ta kegińdi al. Men de onyń sońynan keteıin, bul ókinishtiń kýási bolyp artymyzda sen qal! — dep jigit qolyndaǵy qarýyn usynady.

Kóp jylap ishi-baýyry ezilgen qyz, aqyly sabasyna túsken soń jigitti óltirýge qımaıdy da, jigitpen birge ómir súrýdi jón kóredi jáne jigitke: «Meniń óksik atqan zarymdy tarıhqa qaldyrar óneriń bar ma?» deıdi. Jigit: «bar» deıdi de uzaq tolǵanyp alǵan soń, dombyraǵa qyzdyń oqys ólgen aǵasyn joqtap zarlap jylaǵan qasiretin «Átteń, bóken jarǵaq-aı! Átteń, bóken jarǵaq-aı!» degen kúıge aınaldyryp shertedi eken.

Halyq kúıi «Bóken jarǵaq» osylaı shyǵypty.

---