InfoHub Logo

Ótken zamanda bir baıdyń jylqylarynyń ishinde boz aıǵyry bar eken. Boz aıǵyr jylqylardan uzap alysqa ketpeı, shet jaǵynda júretin. Bir kúni jylqyny urylar aıdap ketedi. Bozaıǵyr úıirimen birge urylardyń qolynda úsh kún bolyp, tórtinshi kúni ózderin aıdap kele jatqan adamdardyń bóten ekenin sezip, aýylǵa qaraı qashyp, úıge keledi. Bozaıǵyrdyń úıirinen bulaısha bólinip kelýiniń tegin emesin sezgen baıdyń balasy, aıǵyrdy júgendep, jylqynyń sońynan qýady. Jylqyǵa jetip, aldyn orap úıirdi keıin qaraı qaıyrady. Urylar balaǵa jan-jaqtan lap qoıyp ortaǵa almaqshy bolǵanda, Bozaıǵyr ústindegi balany bir shetke alyp shyǵady. Bala urylarǵa bir búıirden tıisip, bir-ekeýin qulatady. Urylar balany tirideı ustap alyp, jábirlegisi keledi. Biraq olardyń bul oıyna bala da, Bozaıǵyr da kónbeı, urylardyń taǵy ekeýin qulatyp, keıin qaraı bet burǵanda, ustaı almasyna kózderi jetken urylar sadaǵymen balany atyp sanynan jaralaıdy. Bala
jaraly sanyn belbeýmen tańyp alyp, urylarǵa óshige qaıta tıisip, ózi attan túsip, júrýge shamasy kelmeı qansyrap jatady da, atty qoıa beredi. Bozaıǵyr bosanǵan boıda aýylǵa tartady.

Bozaıǵyrdy kórgen baı qamyǵyp: «Balam ólgen eken, endi ne bolsa da izine túsip izdeıin» dep aıǵyrǵa mingende, Bozaıǵyr baıǵa bas bermeı, taýda qalǵan balaǵa qaraı ala jóneledi. Kelse, shynynda, bala ólipti. Balasynyń ólimine qaıǵyryp, jylap-eńirep baı dalada otyrǵanda qasynda turǵan Bozaıǵyr oqyranyp qoıa berdi. «Taǵy da urylar kelip qalǵan eken», — dep baı záresi ketip, ornynan ushyp tursa, bir salt atty jalǵyz jolaýshy eken. Eriniń qasynda dombyrasy bar. Álgi jolaýshyǵa baı bolǵan jaǵdaıdy túgel baıandaıdy. Sonda jolaýshy:

— Shirkin, janýarym-aı! At bolsa osyndaı, er bolsa seniń balańdaı bolsyn. «Jaqsy at er súıegin dalaǵa tastamaıdy» degen osy da. Balańnyń erligine astyndaǵy aty saı eken. «Jaqsy at jaman jigitti de er etedi» degen bar ǵoı. Myna janýar dál soǵan saı keledi eken, — dep qolyna dombyrasyn alyp bir kúıdi tarta beripti.

Kúı kúńirene baryp aıaqtalǵanda kúızelip otyrǵan baı:

— Zamandas! Myna tartqanyń qaıǵyly saz boldy ǵoı? Atyn ne deısiz? — depti. Sonda kúıshi:

— Janýar myna turǵan Bozaıǵyrǵa razy bolyp, soǵan arnap tarttym, óıtkeni bul aıǵyr bolmasa, seniń balań qaıda qalar edi, sen balańdy qaıdan tabar ediń? — depti.

Osydan bastap bul kúı el arasynda «Bozaıǵyr» atanyp, taralǵan kórinedi.

---