InfoHub Logo

Ońtústik Qazaqstan oblysynda ústimizdegi jyly jańa 42 mektep jáne 6 balabaqsha paıdalanýǵa berildi. Nátıjesinde 11 apatty jáne 9 úsh aýysymda oqytatyn mektep máselesi sheshildi. Bul týraly búgin Astanada Ortalyq komýnıkasıalar qyzmetinde ótken baspasóz máslıxatynda Ońtústik Qazaqstan oblysy ákiminiń orynbasary Ulasbek Sádibekov málim etti.

«Oblysta áleýmettik máselelerdi sheshýge úlken kóńil bólinýde. OQO-da jumyspen qamtýǵa járdemdesý keshendi josparyn jáne «Jumyspen qamtý-2020» baǵdarlamasyn iske asyrý aıasynda 53,5 myń adam jumyspen qamtyldy. Respýblıkalyq kórsetkishtiń 3\1 bóligin quraıdy. 9,7 mlrd teńge ıgerildi. Baǵdarlama aıasynda júrgizilgen sharalardyń nátıjesinde jumyssyzdyq deńgeıi 0,1 paıyzǵa tómendep, 5,2 paıyzdy quraıdy. Jastar arasyndaǵy jumyssyzdyq deńgeıi 3,6 paıyzdy qurap otyr», - dedi ol.

Sondaı-aq, baspasóz aldynda oblys basshysynyń orynbasary bilim men densaýlyq saqtaý salasyndaǵy jetistikterge toqtaldy.

«Ústimizdegi jyly jańa 42 mektep jáne 6 balabaqsha paıdalanýǵa berilip, nátıjesinde 11 apatty jáne 9 úsh aýysymda oqytatyn mektep máselesi sheshildi. Sonymen birge 37 mektepke deıingi bilim berý mekemeleri ashylyp, nátıjesinde balalardy mektepke deıingi bilimmen qamtý úlesi 83,3 paıyzǵa jetti. Bul kórsetkish ótken jyldyń sáıkes kezeńimen salystyrǵanda, 6 myń balaǵa artty», - dedi U. Sádibekov.

«Densaýlyq saqtaý salasynda júrgizilgen júıeli jumystardyń nátıjesinde ólim-jitimder týberkýlezden 15 paıyzǵa, onkologıadan 14,1 paıyzǵa, qan aınalymy júıesiniń aýrýlarynan 16,7 paıyzǵa kemidi. Sonymen qatar náreste ólimi 17,2 paıyzǵa azaıyp otyr», - dep atap ótti oblys ákiminiń orynbasary.

---