InfoHub Logo

Bıyl qazaqstandyq poshta jańa robot-pochtalonmen tolyǵady. Onyń qyzmeti tolyqtaı avtomattyq rejımde bolmaq. Robottyń mundaı túrin shyǵarýshy kompanıa — Cleverest Technologies. Ol Nazarbaev Ýnıversıtetiniń tehnoparkinde ornalasqan.

Ulttyq poshtanyń mobıldi roboty poshta jáne jáshikterdi adamdarǵa aldyn ala belgilengen marshrýt arqyly tasymaldaýǵa múmkindik beredi. Syrt pishini jáı mashınaǵa uqsaıtyn bul robot kedergilerdi aınalyp óte alady. Jaıaý júrginshilerge arnalǵan joldan muqıat ótýge shamasy jetedi ári muqıat burylady. Óıtkeni kamerasy bar. Sonyń arqasynda aınalasyn túgel kórip, bárin jazyp alady. Turǵan jerinde panoramalyq túsirilim jasaýǵa da qaýqarly. Al ony jasap shyǵarýshylar bolsa onyń tek osyndaı qyzmetterdi shamasy jetetinin aıtyp otyr. Robot-poshtashyny jasaýǵa jarty jyldaı ýaqyt jumsalyp jatyr.

Aıta keteıik, Qazposhtada qazirgi tańda Qýanysh jáne Sáýle degen robottar qyzmet etýde. Biri qarsy alsa, ekinshisi keńes beredi. Sáýle degen robot-keńesshi klıentterdi tolǵandyratyn mańyzdy suraqtarǵa jaýap beredi. Tólemdi qalaı júrgizýge bolady, bank kartasy qalaı rásimdeledi degen sıaqty 100 suraqtyń jaýabyn Sáýleden bilýge bolady. Aldaǵy ýaqytta robot-keńesshiniń qyzmet aıasy keńeıedi, ol budan da kóp suraqqa jaýap berip, qazirgiden de kóp keńes beretin bolady. Al Qýanysh adamdarǵa kóterińki kóńil-kúı syılaýǵa tyrysyp baǵady eken. Onymen bir ret tanysqannan soń ol adamnyń esimin saqtap alyp, kelesi kúni tanıtyn kórinedi. Buǵan qosa, aýa raıy men qaıda turǵanyńyzdy aıta alady, Wi-fi paroliniń ózgergeni jaıly maǵlumatty da beredi.

«Qazposhta» AQ-nyń qyzmet túrleri qandaı degen suraqqa keletin bolsaq, qarapaıym tapsyrysty, qundy jazbasha jáne pochtalyq jóneltilimderdi jiberý, qomaqty jáne aýyr salmaqty júkterdi respýblıka ishinde jóneltý men jetkizý, arnaıy baılanys, jedel poshta qyzmeti (EMS qyzmeti), gazet-jýrnaldarǵa jazylýdy rásimdeý, postamat qyzmeti, sálemdemeler sýpermarketi syndy poshtalyq qyzmet túrlerin usynady.

---