InfoHub Logo

Umytpasam 1996 jyldyń Jeltoqsanynda qoǵam qaıratkeri, "Qazaqstan áıelderi" jornalynyń Bas redaktory Altynshash Qaıyrjanqyzy Jaǵanova Jańaózenge keldi. Qasynda sol kezdegi oblystyq mádenıet basqarmasynyń bastyǵy Nurnıaz Muqanov, atalǵan jornaldyń birneshe qyzmetkeri bar. Olarǵa men qosylyp, Beket ataǵa jol tarttyq. Eki júrdek "Ýaz", birinde Altynshash ekeýmiz. Ol ózi qypshaqtyń qyzy, adaıdan shyqqan kórnekti jazýshy Ánes Saraevtyń zaıyby ekenin aıtyp, maǵan jeńgeı bolyp shyǵa keldi. Jol boıy talaı áńgimeniń basyn shaldyq. Atanyń basyna baryp túnedik. Keshqurym jáne tań aldynda taýdan tómen túsip, Atanyń zıratyna baryp táý ettik. Taýdan tómen túsken, qaıta kóterilgen kezderde jeńgeıdi qoltyǵynan demep júrdim. Basqalar bizden uzap ketken shaqta da ekeýmiz áńgimelesip, orta jolda tynystap, birge júrdik.

Erteńine Jańaózenge kelsek, qalanyń ákim-qaralary munaıshylar sanatorııiniń janynda kútip tur eken. Qonaqtarǵa qonaqasy berý syńaılary baryn baıqatty. Demalys ornynyń qol jýǵyshtary bar bólmesine kirip, ústi-basymyzdyń shańyn qaqqannan keıin, qonaqpen qonaq bolmaıyn dep, olardan bólinip, kidiristep qaldym. Endigi oıym qalanyń úshinshi shaǵyn aýdanyndaǵy úıime jetý. Bir kezde sanatorııdiń qyzmetkeri kelip, jurttyń kútip qalǵanyn aıtty. İle shyqsam barlyǵy meni kútip tur eken. Taranyp, sylanyp-sıpanǵan Altynshash jeńgemiz tipti qulpyryp ketipti. Meni kórip:

— Gde ty moı boevoı tovarısh, — dep aıqaı saldy. Meni qoltyqtap alyp, kópshilikke qarap: -qaıda júrseń de janyńda senimdi adam bolǵanǵa ne jetsin, myna jigitińiz sondaı azamat eken, — dep qoltyqtap dastarqan basyna alyp bardy.

Qoshtasarda:

— Seniń aqyn ekenińdi de bilemiz, eki kún joldas boldyq, jornalyńyzǵa óleńderimdi jarıalasańyz eken degen sózdi estı almadyq, basqalar bolsa jarasyn-jaramasyn ala júgirer edi. Óleńderińdi qazir ákelip ber, — dedi.

Biraq men óleńderimdi berip jibere almadym, ýáde boıynsha keıin joldap em, jeńgemiz de ýádesinde turyp, jornalynyń bir betin arnady. Dámdestiktiń syılastyqqa aınalýy shyǵar bul.

---