InfoHub Logo

Dárekeń dep otyrǵanym maıdanger qart-Dármenbaı İńirbaıuly. Uly Otan soǵysynda bir aıaǵynan aıyryldy. Elge oralǵannan keıin bar sanaly ǵumyryn mal baǵýǵa arnady. Balalary óskennen keıin, munan jıyrma jyl buryn Túrikmenstannan atajurty Mańǵystaýǵa baǵyt ustandy. Qyzyltóbe aýylyna kóship kelip, zyńǵyratyp úı salyp aldy. Soǵys múgedegi retinde oblys ortalyǵy Aqtaýdan alǵan tórt bólmeli úıin otaý tikken eki balasyna bólip berdi. Eki ret alǵan avtokóliginiń qyzyǵyn da balalary kórdi. Ulyn uıaǵa, qyzyn qıaǵa qondyrǵan qarıa seksenniń seńgirine aıaq basqanda dúnıeden ozdy.

Meniń bul arada aıtaıyn dep otyrǵanym aqsaqaldyń kirshiksiz aq kóńildigi, qandaı ma kezde de ózin aqjarqyn kúıde ustaı bilýinde.

Bizge qudalyǵy bar, úlken kisi retinde anda-sanda sálemdesýge, kórisýge baratynbyz. Kórgennen kelinine daýystaıdy:

— Aı, Aıman qaıdasyń, tórkinderiń keldi, qazan as.

Men de ózi qaljyńǵa yńǵaı bergen Dárekeńmen bura sóılep, ázildesýge beıilmin. Baltyryndaǵy úlken tyrtyqty nusqap:

— Myna aıaǵyńyzǵa ne bolǵan? — deımin, ony soǵys kezinde oq teskenin bile tura. Ol da esesin jibermeıdi:

— Senderdi qorǵaımyn dep tapqan oljam ǵoı.

— Siz soǵysqa bardym deısiz, qalaı sonda nemisti kórdińiz be? Kınodan kórip jatamyz, ylǵı biz jeńemiz, sonda qalaı bolǵany, — dep men de taqymdaımyn. Ol saqalyn salalap, oılanyp qalady da, aǵynan jarylady.

— Urysqa kirip, alǵashqy shabýyl kezinde oń aıaǵymdy jylan shaǵyp alǵandaı boldy. Ornymnan qozǵalaıyn desem, aıaǵym kótertpeıdi. Bir kezde sanıtarlar kelip, jilinshigimdi oq párshalap ketkenin aıtty.

— Sosyn?

— Sodan soń qasymdaǵy joldastarym jetti. Qazaǵy, túrikpeni bar aýyldas jigitter qaýmalap jatyr. Aıtatyndary: "Saǵan qudaı berdi de saǵan qudaı berdi"...

— Al, siz ne dedińiz?

— Men ne deıin, senderge de qudaı jetkizsin dep jatyrmyn, — dep Dárekeń kúledi. Qaıran aýyldyń ańqyldaǵan aq kóńil qarttary-aı deseńshi?! Endi ondaı jandar qaıda?

---