InfoHub Logo

Meni Aqtaý telearnasy tańǵy "Tańsholpan" baǵdarlamasyna shaqyrdy. Eki óleńimdi oqyp, birneshe saýaldarǵa jaýap berdim. Júrgizýshiniń biri: "Aǵa, ómirińizdegi bir kúlkili oqıǵany aıtyp berseńiz" dep suramasy bar ma? Keshigip qalmaıyn dep qapylyp jetken men mundaı suraq bolatynyn oılamappyn. Sál kidirip kúlkili degen myna oqıǵany aıttym.

...Jańa úılengen kezim, jas kelinshegimmen keshki astan keıin aýyldy qaq jaryp ótetin temir jol boıymen qydyramyz. Aýyl shetinde turatyn Orysbaı degen jigittiń esekteı qabaǵan ıti bar. Oılamaǵan jerden tap berip talaıdy qan qaqsatqan bul ıtten jurttyń bári qorqa soqtap júretin. Orysekeńniń sonymen birge teýip ot aldyratyn "Kovraves" motosıkli de bolatyn. Oıymyzda eshteńe joq, alańsyz álginiń úıiniń janynan óte bergenimizde birdeńe "dar" ete qaldy. It kelip qalǵan eken dep oılaǵan men jalma-jan qos qolymmen jerde jatqan tasqa jabystym. It degenim ot alyp jatqan Orysbaıdyń "Kovravesi" eken. Kelinshegim kúlip jatyr. Sasqannan: "Bul ıt meni tanıdy, tek seni qaýyp ala ma dep tasqa jabystym", deppin ǵoı. Keıde osy oqıǵany eske túsirip kúlip qoıamyz.

---