InfoHub Logo

Ustazdar qoǵamdaǵy eń qajetti mamandyq ıesi. Búgin Astanada «Úzdik pedagog» respýblıkalyq baıqaýynyń jeńimpazdaryn quttyqtaý saltanatty jıynynda  QR Parlamenti Senatynyń depýtaty Darıǵa Nazarbaeva osylaı málim etti.

«Ózimiz júrip ótken jolǵa qarasaq, kimderdi eske alýymyz múmkin? Árıne, eń aldymen ata-anamyzdy oılaımyz. Eń jaqyn adamdardy da jıi oılaımyz. Kóp jaǵdaıda óz ustazdarymyzdy oılaıtynymyz ras. Olar árbir jannyń eń jaqyn degen adamdarynyń qataryna jatady. Ustazdar óziniń jyly otbasynda alańsyz júrgen balaqaıdy qabyldaı otyryp, ony asa qamqorlyqpen qolynan jetelep, bilim, ǵylym, óner jane sport salasyna ákeledi. Sonymen birge balalarǵa ómirdiń  qarama-qaıshylyqtary, qıynshylyqtary men synaqtary  bolatynyn da túsindiredi. Elimizde jyl saıyn mektep bitirýshi túlekterge mamyr aıynda sońǵy qońyraý soǵylady. Bul kúni túlekterdiń de, olardyń ata-analarynyń da kózderi jasqa tolady. Bul -   Sizderdiń eńbekterińizge, bala tárbıeleýdegi erlikterińizge,  kún saıyn alǵys kútpeı-aq úlken is tyndyratyn jumystaryńyz úshin alǵysqa toly kóz jasy. Sizder bizdiń qoǵamdaǵy eń qajetti mamandyq ıesi bolasyzdar, qadirli Ustazdar!» - dedi Senat depýtaty.

Sonymen qatar Darıǵa Nazarbaeva elimiz Táýelsizdiktiń 25 jyldyǵyn atap ótetin óte mańyzdy qadamǵa jaqyndap kele jatqanyn,  shırek ǵasyrda ómirge kelgen balalar, ıaǵnı Táýelsizdiktiń qurdastary osy ýaqytta er jetip, bilim alǵanyn, mamandyqqa ıe bolyp, kóbi ata-ana bolyp úlgergenin atap ótti.

«Shyndyǵyn aıtqanda, osy 25 jyl jaı jyldar emes. Neshe túrli jaǵdaılar boldy. Ol týraly men aıtpasam da bolady. Biraq ony bárimiz umytpaýymyz kerek. Alaıda osy qıyndaý bolǵan shırek ǵasyrlyq jolda qyrkúıek aıynyń basynda  alǵashqy qońyraý,  mamyr aıynyń sońynda sońǵy qoshtasý qońyraýy soǵylmaı qalǵan jyl joq. Mektep baly da eshqashan ótpeı qalǵan emes, túlekter tańnyń alǵashqy sáýlesin kútip alady, ul balalardy eshqashan eshqandaı soǵysqa alyp ketken joq. Sebebi, soǵys degen bolǵan joq. Halyq danalyǵy men sol halyqty basqaryp otyrǵan Elbasynyń aqyldylyǵy beıbitshilik pen birlikti saqtaýǵa yqpal etti. Osyndaı asa baǵaly jetistikte sizderdiń árbirińizdiń  úlken úlesterińiz, janqıar eńbekterińiz bar, qymbatty bizdiń ustazdarymyz! Sol úshin sizderge bas ıemiz!» -dedi depýtat. 

---