InfoHub Logo

Nurıla on jasynda qudyqtan sý alýǵa barady. Bir kezde ańdaýsyzda qyzdyń qoly tıgen qaýǵa ilgekten syrǵyp shyǵyp, shyńyraý túbine qulaı zymyraı jóneledi. Jylqynyń qylynan esken arqandy baıqamaı ustaǵan Nurıla qaýǵa ekpinimen tómenge qaraı qulaıdy. Belýarynan keletin sýyq qudyq sýynda Nurıla dirdek qaǵyp, zorǵa shydap turady. Bir kezde Báıdibek qasyndaǵy bir top jigitterimen álgi qudyqtyń basyna kelip qalady da, Nurılany qudyqtan shyǵaryp alady. Nurıla keıin ózine quda túskenderge qudyq basyn daǵy ýaqıǵany baıandaıdy. «Bilegimdi ustaǵan kisi — Báıdibek, meniń bolashaq erim sol bolmaq. Ózge adamǵa kúıeýge shyqpaımyn», — dep kóńilinde júrgen syrdy aıtyp salady. Nurıla Báıdibekti unatyp, ekeýi birin-biri kórmese tura almaıtyn jaǵdaıǵa jetipti. Eki jastyń ystyq yqylasyn ishteı sezip, syrttaı baıqap júrgen Maqtym Aǵzam atamyz Báıdibek batyrdy shaqyrtyp alyp: «Balam, men saǵan Nurılamdy bereıin, tuqymyń qısapsyz mol bolady. Jarkentten Tashkentke deıin, Atyraýdan Altaıǵa deıin seniń urpaǵyń, tuqym-tuıaǵyń qanat jaıady. Jalǵyz aıtar atalyq tilegim — qyzymdy renjite kórme. Aıalap, mápelep, aqqýdaı álpeshtep usta! Bul qyzymnyń bir boıynda myń asyl qasıeti bar», — depti. Sonymen, eki balasyna egilip-tógilip otyryp, aq batasyn bergen eken.

 

---