InfoHub Logo

Bir kúni Maqtym Aǵzam sofy tús kóripti. Túsinde Qoja Ahmet Iassaýı babasy aıan beripti: «Jalǵyz nemere qyzyńa áýlıelik daryp, baq qonady. Onyń bileginen kim ustasa, sol adamǵa nekesin qıyp qos! Úbirli, shúbirli baqytty bolady», — depti. Oıana ketse, túsi eken. «Iá, Qudaıa, osy túsimdi Paıǵambar joryp, Nurıla qyzymdy baqytty qyla gór, aýmın!» dep bata qylypty.

Bul kezde Nurıla segiz jasta, meshitte dáris oqyp júredi. Jyldar ótedi. Nurılanyń jasy on tórtke tolǵanda mynadaı oqıǵa bolady: bir kúni Nurıla qudyqtan sý alýǵa barady. Ol kezde sýdy túıe moınaq qaýǵamen tartatyn. Nurıla shyǵyrdy aǵytyp, qaýǵany qudyqqa túsiredi. Shyǵyrdyń tutqasyn shıqyldatyp aınaldyryp, sý tola túıe moınaqty ózine qaraı tarta bergende, shyǵyr aǵytylyp ketip, qaýǵa- maýǵasymen qyz tereń qudyqtyń túbine kúmp etedi. Ony jolda oınap júrgen balalar syrtynan kórip, aýylǵa habarlaıdy. Elden buryn Báıdibek júgirip jetip qudyq túbine eńkeıip qarasa, qyz qaýǵadan ustaǵan kúıi sý betinde qalqyp tur deıdi.

— Nurıla, qaýǵadan myqtap usta, men tartyp shyǵaraıyn, — dep aıqaılaıdy da, shyǵyrdy buraıdy. Qyz qudyq aýzyna jetkende, Báıdibek onyń bileginen ustap shyǵaryp alady. Qudyqtyń muzdaı sýyna tońyp, dirdektep turǵan qyzdy shapanyna orap, balasha kóterip, atasynyń úıine aparady. Zuhra ájesi jigijapar bolyp, oǵan ystyq sút berip, jylytyp alady.

Erteńine Túrkistannan Maqtym atasy keledi.

— Shyraǵym, qudyqtan seni Báıdibek batyr qaıtip alyp shyqty? — dep suraıdy.

— «Qaýǵadan myqtap usta!» — dedi. Men ustadym. Qudyqtyń aýzyna jaqyndaı bergenimde bilegimnen ustap, shyǵaryp aldy. Shapanyna orap úıge alyp keldi.

— Endeshe, seni sol batyrǵa uzatamyz. Ózińe aıtyp em ǵoı, men tús kórgemin. Túsimde Qoja Ahmet babam: «Nemereńniń bileginen kim ustasa, soǵan ber, balaly-shaǵaly baqytty bolady» — dep.

Sol áýlıe-baba aıan bergendeı, kelesi jyly Nurıla Báıdibek bıge turmysqa shyǵady. Toı birneshe kúnge sozylady.

---