InfoHub Logo

Búkil dúnıe júzilik Beıbitshilik Sovetiniń úndeýine elimizde jappaı qol qoıý bastaldy. Júregi aq, nıeti adal barsha adamdardyń tilek-múddelerin beıneleıtin bul tarıhı dokýmentke qazirdiń ózinde san mıllıon eńbekshiler qol qoıdy. Kúni erteń budan áldeqaıda kóbeımek.

Úndeýge qoıylǵan esepsiz kóp qoldardyń arasynda meniń týǵan halqymnyń — qazaq halqynyń uldary men qyzdarynyń, káriler men jastarynyń qoldary bar.

Halyq beıbitshilikti ardaqtaıdy. Jasampaz eńbek jyldary Qazaqstandy gúldengen ólkege aınaldyrdy. Tarıh turǵysynan az ǵana merzimde qazaq jerinde adam aıtqysyz ǵajap ózgerister boldy. Respýblıka jerinde kóptegen óndiris oryndary ornady, ondaǵan kómir shahtalary salyndy, tolyp jatqan munaı skvajınalary burǵylandy. Bizdiń qazaqtar qant qyzylshasynan, kúrishten jáne temekiden mol ónim aldy. Halyqtyń ulttyq mádenıeti jańa beleske shyqty.

Búgingi kúni qazaqtar maqtan tutyp otyrǵan keremetterdiń bári uly orys halqynyń kómegimen, basqa halyqtardyń kómegimen jasaldy. Moskva men Lenıngradtyń ǵalymdary Qazaqstan jeriniń qoınaýynan kómir, temir, tústi metal kenderiniń jańa mol qazynasyn tapty. Ázirbaıjannyń munaıshylary Embi kásipshilikterinde munaı óndirisin jolǵa qoıýǵa kómektesti. Donbastyq taý kenshileri Qaraǵandy shahtalarynda qyrýar. eńbek istedi. Ózbek aǵaıyndar ózderiniń talaı ǵasyrdan bergi jınaǵan maqta ósirý tájirbıesin bizden aıaǵan joq. Dándi daqyldardan mol ónim alý tásilin biz sıbırlikter men volgalyqtardan úırendik.

Halyqtardyń osy dostyǵy — bizdiń búkil jeńisterimizdiń kepili. Bul jańa turmysty biz budan otyz tórt jyl buryn jeńip aldyq. Biz uly besjyldyqtarda elimizde sosıalızm ornattyq. Endi jappaı komýnızm ornatyp jatyrmyz. Búkil jer júzinde beıbitshilikti saqtaý úshin ıgi kúres júrgizýdemiz.Jer sharynyń barsha adal adamdary bizben birge. Biz jeńemiz.

Uly Oktábr meıramy jaqyndap keledi. Ulystyń uly kúnin respýblıka eńbekshileri eńbektegi jańa tabystarymen qarsy alady. Jeńisterimen bizdiń ómirimizdi kórkeıte túsetin, jaınata beretin jasampaz erlik maıdany barlyq jerlerde qyza túsýde. Bul qarqyndy tvorchestvolyq eńbekte Amerıka men aǵylshyndardyń ósekshi jaǵympazdary jala jaýyp kókip júrgen — soǵysqa daıyndyqtyń tıtimdeı yrymy da joq.

Elimizdiń túrli aýdandarynda, onyń ishinde Qazaqstanda bolyp ketken shetelder delegasıasy tómendegideı málimdeme jasady.

— Beıbitshilik isin qorǵaýǵa qazaq halqynyń berik bel baılaǵanyna, respýblıkanyń búkil ekonomıkasy men áleýmettik ómirin osy maqsatqa baǵyndyrǵanyna bizdiń kózimiz ábden jetti. Biz muny ózimiz bolǵan kezde júzege asyrylǵan, ózimiz qatysqan sharalardan, kezdesýlerden, áńgimelerden anyq kórdik.

Beıbitshilikti qorǵaýdaǵy ıgi iste Amerıka men aǵylshyn ımperıalıseriniń zulymdyq josparlaryn áshkereleýde jazýshynyń atqaratyn qyzmeti óte zor. Biz beıbit eńbegimizge bóget jasap, tosqaýyl qurǵysy keletin aram nıettilerge qarsy qarýymyzdy saılap turýymyz kerek.

Búkil uly Sovet elimen birge bizdiń qazaq halqy da dúnıe júzinde beıbitshilikti saqtaý úshin komýnızmge qaraı qaryshty qadammen alǵa basa berý úshin aıanbaı kúresedi.

1951

---