InfoHub Logo

Sovettik Sosıalısik Respýblıkalar Odaǵy qurylǵaly otyz jyl toldy. Osy otyz jyldy jeke-jeke alsaq ár respýblıkanyń tarıhynda bir bıik tárizdi, tutas alsaq — sol bıikter birigip bizdiń aqbas Alataý tárizdi bop kórinedi. Sovettik ómirdiń tabysy, tarıhy sonshalyq aıdyndy. Ǵasyrlar boıy kóshýmen, mal baǵýmen kelgen qazaq eliniń kórkin bul jyldar múlde ózgertti. Buryn júz qazaqtyń ishinen bir saýatty azar tabylsa, qazir orta nemese joǵary bilimdi adamdar eki úıdiń birinen tabylady. Qazaq respýblıkasynda tek joǵary dárejeli oqý oryndarynyń sany 27-ge, tehnıkýmdar sany 85-ke jetti. Qazaqtyń óz aldyna Ǵylym akademıasy quryldy.

Bir kezde «shaıtan arba», «shaıtan shamnan» shoshıtyn el bul kezde olarsyz tura almaıtyn bolǵan. Ulan-baıtaq dalamyzdy jańartyp, túrlentip baratqan joıqyn kúsh — elektr, motor. Qol oraq, aǵash rydýandardy endi mýzeıden ǵana kórýge bolady. Burynǵy qazaq at tizginin qandaı ustaı bilse, búgingi qazaq sosıalısik tehnıka tizginin sondaı ustaı biledi. «At erdiń qanaty» degen mátel eskirdi. Poezd, samolet, mashınalar el qanatyna aınaldy.

Qazaqstan iri ónerkásipterimen de, mádenıetimen de Sovetter Odaǵynda aldyńǵy respýblıkalardyń qataryna qosyldy. Búkil sovet eliniń úshinshi kochegarkasy — Qaraǵandy bizde. Balqash, Jezqazǵan, Shymkent tústi metalýrgıa zavodtary, Temirtaý qara metalýrgıa zavody bizdiń jerde. Áli paıdaǵa aspaı jatqan baılyqtar el kórkin, tabıǵat kórkin túrlentý úshin jasalyp jatqan jańa qurylystar qansha! Bizdiń jumysshylarymyz, kolhozshylarymyz eńbek qyzyǵyna sonshalyq berilgen.

— Kesheden búgin, búginnen erteń jaqsy istep, komýnızmge tez jetsek, — deıdi. Tez jetý jarysynda malshylardan, eginshilerden, jumysshylardan talaı-talaı eńbek erleri shyǵyp jatyr. Qazaqstan Ǵylym akademıasynyń mańyna toptalǵan ǵalymdarymyz osy eńbek tasqynyna keńirek jol ashý, jerimizdiń jasyryn baılyqtaryn taba túsý jolynda eńbek istep keledi. Qazaqstan Jazýshylary odaǵy mańyna toptalǵan jazýshylarymyz, Qazaqstan óner qaıratkerleri kún sanap jańarǵan halqynyń beınesin, sezimin kórsetý jolynda eńbek istep keledi.

«Barlyq tabystarǵa Komýnıstik partıanyń basshylyǵy arqasynda, uly orys halqynyń kómegi arqasynda jettik, áli de jete beremiz!» deıdi búkil qazaq.

«Bul tabystardy qaskúnemderden, soǵys órtin salýshylardan barymyzdy sala qorǵaımyz», — deıdi búkil qazaq.

---