InfoHub Logo

Vengrıanyń Dór qalasynda ótken Dúnıejúzilik robottar olımpıadasynan qazaqstandyq zıatkerler quramasy úshinshi oryn aldy. Qola medal ıegeriniń biri Almaty qalasy fızıka-matematıka baǵytyndaǵy Nazarbaev Zıatkerlik mektebiniń oqýshysy Lúbov Dýdchenko. Ol taldyqorǵandyq qurdastarymen bir quramada óner kórsetip, shyǵarmashylyq sanatynda baq synaǵan bolatyn.

«Fınalǵa jetý úshin aldymen, qalalyq, sosyn respýblıkalyq, odan keıin quramaǵa ený kezeńderi bar. Osynyń barlyǵynan ótkennen keıin ǵana álemdik dodaǵa attana alasyń. Bul – úlken eńbek. Týra osy jarysqa men 8-shi synypta da qatystym. Biraq, sońyna deıin jete almaǵan edim. Ol kezde komandamyz respýblıkalyq kezeńnen İİİ oryn aldy. Eki jyl buryn respýblıka boıynsha İİİ oryn alsaq, endi bıyl álem boıynsha qola medal ıelendik», - dedi Lúbov Dýdchenko.

Onyń aıtýynsha, komandalastarymen qurastyrǵan robot alǵashynda oıyndaǵydaı shyqpaı, biraz alańdatqan. Biraq jarystyń masshtaby, ár elderden kelgen myqty básekelester qazaqstandyq oqýshylardyń jigerin eselendirse kerek. Halyqaralyq jarystyń aqtyq máresine álemniń 73 elinen 424 komanda qatysypty.

«Koreıa, Japonıa, Germanıadan kelgen kil myqty komandalar boldy. Shynymdy aıtsam, robot qurastyrýǵa arnalǵan birinshi kúnniń sońynda qatty ýaıymdadyq. Sebebi, qurastyrý barysynda qıyndyqtar týyp, qolymyzdan keler me eken, eń bolmaǵanda úzdik ondyqqa ensek eken dep oıladyq. Biraq, ertesinde ózimizdi jınaqylap, qaıtadan iske kiristik. Marapattaý saltanatynda bizdi, elimizdi atap shaqyrǵan sát bárinen erekshe. Týymyzdy tike ustap, sahnaǵa júgirip shyqtyq. Armanym – Qazaqstandy álemge áıgili etý. Aqyryndap oryndalyp jatqandaı», - dedi Lúbov Dýdchenko.

Dúnıejúzilik robottar olımpıadasy – 2004 jyldan bastap 10-21 jas aralyǵyndaǵy oqýshylar men stýdentter arasynda ótetin halyqaralyq jarys. Jyl saıyn Olımpıadaǵa 2 myńnan astam daryndy bala qatysady. Bıylǵy jarysqa «Aqyldy qalalar» taqyryby bekitilgen. Qatysýshylarǵa bolashaqtyń qalasyn qurýdaǵy jańa tujyrymdamalar, ıdeıalar men tehnologıalar usyný mindettelgen.

---