InfoHub Logo

Kún saıyn tyń jańalyǵymen tańqaldyryp otyrǵan búgingi azamattyq qoǵamnyń damýyna áser etetin kúshterdiń biregeıi – eriktiler bolyp otyr. Prezıdentimiz Qasym-Jomart Kemeluly Toqaevtyń 2020 jyldy Qazaqstandaǵy «Eriktiler jyly» dep jarıalaýynyń ózi eriktiler qaýymynyń qoǵamymyzda alar orny erekshe ekendiginiń aıqyn belgisi. 

Jalpy, «Eriktiler» degenimizdiń ózi kimder? Olardyń atqarar jumysy qandaı bolmaq?  Eriktiler – olar úlkendi-kishili kómektiń san túrlerin barsha jurtshylyqtyń ıgiligi úshin aqshalaı syıaqysyn esepteýsiz, qaıtarymsyz, erikti túrde júzege asyryp, muqtaj jandarǵa kómek qolyn sozýshylar. Jáne ózgelerdiń ıgiligi jolynda sanaly da rıasyz eńbek etken kez-kelgen adam erikti bolyp tabylady. Erikti toptardyń atqarar qyzmetteri de san alýan. Aıtalyq, qalaýlaryna qaraı ekologıalyq qozǵalystar, aǵashtar  men gúlderdi otyrǵyzý, halyqtyń qaýqarsyz toby: jalǵyzbasty qarttar, múmkindigi shekteýli jandar men úısiz otbasylarǵa qarjylaı kómekter, iri qalalyq, halyqaralyq  is-sharalar men festıváldardy uıymdastyrýǵa atsalysý erikti toptar quzyrynda. Júrekteri ımanmen nurlanǵan, jandary jaqsylyqqa qumar janashyrlardyń ıgi qyzmetteri el tarıhynda Nur-Sultanda ótken VII Qysqy Azıa oıyndarynda joǵary dárejede kórsetilgen bolatyn. Búginde Nur-Sultanda volonterlik mádenıetti qalyptastyrý jáne qoldaý maqsatynda 2010 jyly qurylǵan Ulttyq Volonterlik Jeli bar. Bul da elimizde parasatty tulǵalardyń qatary kóbeıip, turmysy tómen qandastarymyzdy aıaqqa turǵyzý arqyly memleket damýyna áser etip, óskeleń urpaqqa tamasha úlgi kórsetip jatqandyǵynyń jarqyn aıǵaǵy. Alaıda, qoǵamda aıtýly ról atqaryp júrgen volonterler qyzmetin damytý men qoldaý tarapynyn ózekti máseleler shyǵyp jatqandyǵy da jasyryn emes. Elbasymyzdyń Jarlyǵymen bıylǵy jyldyń «Eriktiler jyly» dep jarıalanýy volonterlik bastamalardyń memleket tarapynan qoldaýdyń az tabylýy syndy máselelerdi sheship, kómekke qushtar eriktilerimizdiń órisin keńeıtetin «Volonterlik qyzmet týraly zań» shyǵarý, olardyń mártebesin kóterý, memleket tarapynan materıaldyq turǵyda qoldaý tanytý sıaqty usynystardyń is júzinde oryndalýyna jol ashsa nur ústine nur. Bul bastama volonterlerdi tegin jumys kúshi retinde paıdalaný degen túsiniktiń qalyptasýyna jol bermeı, volonterler ınstıtýtyn qalyptastyryp, olardyń quqyǵyn qoldaı otyryp, eriktilerimizdiń el ekonomıkasyna tıgizip jatqan zor úlesin keńinen dáripteýge septigin tıgizeri anyq.                               

Aldymyzdaǵy 2020 jyldyń «Eriktiler jyly» bolyp eski ashýy elimizdegi 200-den astam eriktiler uıymy men 50 myńnan astam belsendi eriktilerimizdiń ortaq jemisi, qýanyshy bolǵaly tur. Baǵzy zamannan keńpeıildiligimen tanylyǵan halqymyzda jaqsylyqtyń jarshylaryn nasıhattaý jylynyń jarıalanýy memlekettiń mereıin asyryp, tyń serpin bereri sózsiz. Bekitilgen bul qadam belsendi tulǵalardyń sanyn arttyryp, jeńiske, shabytqa toly bolǵan «Jastar jylynyń» qısyndy jalǵasy, rýhanı jańǵyrýdyń tamasha jetistigi bolmaq.             

---