InfoHub Logo

- Dosan, Tańnyń besigin terbete turshy, myna jerdi kishkene jınap alaıyn, - dedi Gúlzıra kúıeýine qarap.

Dosan besiktegi balasynyń janyna kelip otyrdy. Kózi jyltyrap jatqan sábıine qarap:

- Ertegi aıtyp bereıin be? - dedi Dosan. Sonan soń:

- Ákeń tirlik dep júrip ertegini de umytty ǵoı. Sonda da aıtyp kóreıin endi, - dedi.

Erte, erte, erte zamandarda hannyń aı dese aýzy, kún dese kózi bar qyzy bolypty. Ózi sulýlyǵymen birge aqyldy eken. Sondyqtan ba janyna eshbir jigitti teńgere qoımapty. Osylaı ýaqyt óte beredi. Bir kúni hannyń qyzy el aıtyp júrgen áńgimeden Dosannyń uly Tań degen jigittiń bar ekendigin estıdi.

Gúlzıra kúıeýiniń aıtyp otyrǵan ertegisine ózi men balasynyń atyn da qosyp jibergenin estip kúlip jiberdi.
Dosan ertegisin ári qaraı jalǵady:

Bir kúni qyz ákesiniń ýázirlerine "men Dosannyń uly Tańdy kórgim keledi" deıdi. Ýázirler Tańnyń úıine kelgende, Tań úıde joq edi. Tańnyń anasy Gúlzıra ýázirlerdi kórip ýaıymdap qalady. Biraq ýázirlerdiń júzi jyly edi. Olar Tańdy hannyń qyzy kórgisi keletindigin jetkizedi.
Tań ordaǵa keledi. Hannyń qyzy Tańnyń kórki men symbatyna ishteı kóńili tolypty. Biraq syrtqa syr bermegen kúıi jigittiń batyldyǵyn synap kórmekshi bolady. Qyz qandaı synaqtan ótkizse de, Tań óziniń erjúrek, batyldyǵymen qyzdy qaıran qaldyra beripti. Qyz endi osynaý kórikti de batyl jigittiń aqyly men bilimin de synap kórmekshi bolyp, oǵan sheshýi qıyn suraqtar usynady. Qyz qandaı suraqtar qoısa da, Tań ony
zerektigimen, aqyl-bilimimen tánti ete berdi. Jigittiń kórki men batyldyǵyna aqyl-bilimi de saı ekendigine ábden kózi jetken qyz endi Tańǵa bylaı deıdi: "Maǵan ónerińdi kórset, jigit adam ónerli bolýy tıis". Tań ónerimen qyzdyń kóńilin tolqytty. İshteı izdegeni osy jigit ekendigin
túsingen qyz ákesine qarap: "Áke, meniń teńim - osy jigit, batańyzdy berińiz" deıdi. Han ruqsatyn beredi. Tań hannyń qyzyn jetelegen kúıi úıine alyp kelgende, Tańnyń anasy áýelde tańyrqap qalady. Solaısha hannyń qyzyn kelin etip alyp, hanmen quda bolǵan eken.

- Hannyń áıelimen qudaǵı bolypty deseńshi, - dedi Gúlzıra kúlip. Sonan soń jeńil kúrsindi:

- Shirkin-aı, qalada  óz baspanamyz da bolatyn ýaqyt qashan bolady eken?

Dosan jaryn jubata sóıledi:

- Osyǵan da shúkir de, janym. Aýyldan qalaǵa kelgenimiz endi ǵana ǵoı. Osy páterdiń páteraqysyn ýaqytyly taýyp bere alyp otyrǵanymyzǵa da shúkir de. Erteńimiz jaryq bolar, áıteýir.

Erli-zaıyptylar besiktegi uldaryna bir túrli úmitpenen qarady.

---