InfoHub Logo

Qalyń qar balalarǵa shattyq ákelgenimen, kólik ıelerine birshama másele týdyrady. Kólikti qar men muzdan tazalaýdyń ońaı joly, ony júrgizý men mejeli jerge jetý – biz sizderge ár júrgizýshige paıdaly bolatyn 16 aıla-tásildi toptastyrdyq.

Terezeni qar men muzdan tazalaýdyń 7 tásili

1. Tereze tazalaǵyshty kóterip, bir túnge solaı qaldyryńyz. Osylaısha onyń terezege jabysyp qalýynyń aldyn alasyz.

2. Terezelerdiń qatyp qalmaýyna sirke sýynyń úshten bir bóligi men sýdyń bir bóliginiń qospasy kómektesedi: ony aldyńǵy terezege seýip, bir túnge qaldyryńyz. Sonda terezeniń qaryn tazalaý áldeqaıda jeńil bolady.

3. Qurǵaq shúberek pen spırt terezege qatqan muzdy tezirek jibitýge múmkindik beredi.

4. Aldyńǵy terezeni muz basyp qalmas úshin myna tásildi paıdalanyp kórińiz: eski kilem, brezent nemese qalyń matany terezege tósep, tereze tazalaǵyshtyń astyna qystyryp qoıyńyz. Biraq muny temperatýranyń jyldam aýytqýy kezinde nemese qar qatty jaýǵan kezde jasaýǵa bolmaıdy.

5. Eger qolyńyzda qyrǵysh bolmasa, onda qatty qalaqsha nemese kredıttik kartany paıdalanýǵa bolady, eń bastysy – metal paıdalanbańyz, áıtpese betin syryp alý qaýpi bar.

6. Búıir terezelerdi muzdan qorǵaýǵa qarapaıym plasık paketter kómektesedi.

7. Eger kólikti shyǵysqa qaratyp qoısa, onda tańerteń kún túsip, qardy biraz eritedi. Osylaısha kólikti tezirek tazalaýǵa bolady.

Qulyp pen esikke muz qatyp qalýdan qorǵaýdyń 4 tásili

1. Kóliktiń qatyp qalǵan qulyby men esigin ashýǵa qoldy dezınfeksıalaýǵa arnalǵan qurylǵy kómektesedi.

2. Sonymen qatar kiltti ottyq arqyly ysytyp alyp, aqyryndap qatyp qalǵan qulypqa kirgizý kerek.

3. Aldyn ala kiltke WD-40 jabdyǵyn shashsańyz bolady.

4. Qatyp qalǵan esikti ashý úshin ony basyp kórińiz. Taǵy bir tásili – jyly (ystyq emes) sý, nemese antımuzdatqysh qospany paıdalaný.

İshki terezeni qorǵaýdyń 2 amaly

1. Mysyq dáretine arnalǵan toltyrǵyshtar terezeniń býlanýynyń aldyn alyp, dymqyl men túrli ıisti sińirip ala alady. Ony shulyqqa salyp, kóliktiń bir jerine tyǵyp qoıýǵa bolady.

2. Qyrynýǵa arnalǵan krem terezeniń ishki jaǵyn tazalaýǵa kómektesedi jáne býlanýynyń aldyn alady: kremdi jaǵyp, qurǵaq shúberekpen súrtip shyǵyńyz.

Qytymyr aıazda da kólikti otaldyrýǵa kómektesetin 3 keńes

1. Eger sýyq túskeli jatqanyn baıqasańyz, kóliktiń akýmýlátoryn abaılap alyp, úıge kirgizip qoıyńyz.

2. Eger kólik 15-20 sekýnd boıy otalmasa, bylaı jasap kórińiz: kiltti bastapqy qalypqa keltirip, sharshaǵan akýmýlátorǵa demalýǵa 2 mınýt ýaqyt berińiz, keıin taǵy otaldyryp kórińiz. Bul prosesti qaıta-qaıta qaıtalamańyz – osylaısha siz akýmýlátordyń jaǵdaıyn odan saıyn nasharlatasyz. Durys baǵdar – starterdiń burý jyldamdyǵy.

3. Kólikti otaldyrýdyń eń durys joly – «tutatqysh». Ózińizde daıyn kabelder bolsyn – bul sizge basqa kóliktiń akýmýlátoryna qosylýǵa múmkindik beredi. Biraq akýmýlátoryńyz «esin jıyp» bastapqy qalpyna kelýi úshin qozǵaltqysh bir saǵattaı jumys isteýi kerek.

---