InfoHub Logo

Kishkentaı Dıas nannyń orysshasyn aıtyp qaldy...
Sálıma esikten endi ǵana kirip kele jatyrǵan uly - Dıastyń ákesi Aıhannyń aldynan júgire shyqty.
- Áı, balań nannyń orysshasyn aıtyp otyr ǵoı.
Aıhan muny estı sala syrtqy esikti de jappastan Dıas otyrǵan bólmege aptyǵa kirdi.
- Qane, qane, aıtshy nannyń orysshasyn.
Biraq kishkentaı Dıas qyrsyǵyp aıtpaı qoıdy.
- Qyrsyǵyp tur, - dedi Sálıma nemeresine súısine qarap. - Baǵana aıtyp otyrǵan edi.
- Ana bólmede júrsem, - dedi Sálıma endi osyny ulyna túsindirmek bolyp. - Tananyń "mama, mama" degen jan daýsy shyqsyn. "Qudaı-aý,
ne bop qaldy, Dıasjanǵa birdeńe bop qaldy ma?" deımin. Asyǵyp-úsigip jetemin ǵoı, baıaǵy. Sóıtsem, Tana "mama, Dıas nannyń orysshasyn aıtyp otyr" deıdi. "Qudaı, jaryǵym, sol, nannyń orysshasyn bilip otyrǵan, jaryǵym!" Qýanyp jatyrmyn ǵoı.
Osy kezde ashyq turǵan esikten oń jaqta turatyn kórshi Zarına kirdi.
- Aý, bul ne dabyr? Ne bolyp jatyr? Esikterińdi ańqıtyp ashyp tastapsyńdar ǵoı.
Sálıma endi álginde ǵana Aıhanǵa aıtqan áńgimesin Zarınaǵa aıta bastady:
"Baǵana ana bólmede júrsem..."
- Oıbaı, bálesin-aı! - dedi Zarına Sálımanyń aıtqan áńgimesine ne súısingeni, ne ádeıi istegeni belgisiz. - Bizdiń qyz nannyń qazaqshasyn da aıta almaıdy ǵoı.
- Ketshi, seniń qyzyń degen áli tili shyqpaǵan bala emes pe?
- Toı jasa endi, - dedi Zarına Aıhanǵa kúle qarap.
- Jasaıdy ǵoı, nege jasamasyn? - dedi Sálıma. - Qamyryńdy ıleı ber, - dedi sosyn kelini Tanaǵa qarap.
Osy kezde esikten sol jaqta turatyn kórshi Aıbol kirip keldi.
- Aý, bul ne dabyr? Toı bar ma?
Sálıma endi Aıhan men Zarınaǵa aıtqan áńgimesin Aıbolǵa da aıta bastady.
Biraq Aıbol bul jańalyqqa onsha elp ete qalǵan joq. Onyń ornyna:
- Biraq ol nannyń aǵylshynshasyn aıtyp otyrǵan joq qoı, - dedi.
Úı ishi bir túrli samsoz boldy da qaldy.
- Aıtqan jurt aıta bersin, - dedi Sálıma Aıbol men Zarına shyǵyp ketkennen keıin uly men kelinine qarap. - Ózderiniń balalary nannyń orysshasyn da bilmeıdi. Baýyrsaǵyńdy qamdaı ber.
Aıhan ulyn qaqpaqyldaı kóterip:
- Óskende kim bolasyń, óskende kim bolasyń? - dedi. - Ǵalym bolyp shyǵar ma ekensiń?
Tananyń qabaǵy shytyla qaldy:
- Aýzyńa bir jóni túzý mamandyq ta túspedi-aý.
Sálıma uly men kelininiń arasyndaǵy jaǵdaıdy jýyp-shaıdy:
- Bastyq bolady ǵoı, uldaryń dáý bastyq bolyp otyrady.
Úı ishi qaıtadan jaıma-shýaqtana qaldy.

---