InfoHub Logo

Adam úshin eń qymbat uǵym – ómir. Adam balasy óziniń sanaly ǵumyrynda osy ómirdi baqytty ótkizýge tyrysady. Aldyna maqsat qoıyp, asyl murattarynyń oryndalýy úshin kúresip baǵady. Ómirdiń ǵajaıyp syrlaryn ashyp, mahabbat áleminiń tuńǵıyǵyna úńiledi, urpaǵyna mıras bolarlyq máńgilik ǵumyrdy jalǵastyrýdy kózdeıdi. Eger ómir osynshalyq qymbat bolmasa, munyń bári bos áýreshilik emes pe? 

Ómir – árqaısymyz úshin óte mańyzdy. Biz erjetken saıyn aqyldy bola bastaımyz, biraq bir nárseni túsine almaımyz: ómirdiń máni nede? Nelikten biz dúnıege kelemiz, ómir súremiz? Munyń bári ne úshin? Bul qanshalyqty mańyzdy jáne ony kim basqarady? Nelikten biz eń mańyzdy nárselerdi basqara almaımyz? Meniń oıymsha, ómirdiń máni-odan lázzat alý. Men búgin, dál qazir myna jaryq álemde ómir súrgenime qýanyshtymyn. Kún saıyn men sáýlesin shashqan nurly kúndi, shegi joq kógildir aspandy, qara túndi jaryq qylǵan samsaǵan juldyzdy kóremin… Men aqyldy adammyn, ómirdiń bir-aq ret beriletinin, sondyqtan ómirdi baǵalaý kerektigin túsinemin. Meniń qorqynyshpen ómir súrgim kelmeıdi, ata-anam baqytty bolǵanymdy kórgenin qalaımyn. Dostarymnyń meni temeki shekkenim nemese esirtki qabyldaǵanym úshin emes, jaǵymdy qylyqtarym úshin qurmettegenin qalaımyn. Men baqytty ómir súretinime senimdimin, óıtkeni men ómirime qaýip tóndiretin esirtkige «meniń ómirimde saǵan oryn joq!» dep aıta alamyn, óıtkeni meni qoldaıtyn qymbat adamdarym qasymda, óıtkeni meni baqytty etetin barlyq múmkindik bar. Men óz taǵdyrymdy ózim jasaımyn. Eshqandaı esirtki bizdiń ómirimizdi jarqyn etpeıtinin, ol tek maqsatyńa, armanyńa jeter joldy jabatynyn anyq túsinemin.

Tek ózimniń ǵana emes, meniń janymdaǵy adamdardyń da ómiri esirtkige táýeldi bolǵanyn qalamaımyn. Esirtkiniń adam ómirine zıanyn men sekildi jasóspirimder túsinse eken, ata-babam qasyq qanyn tógip syılaǵan beıbit zamannyń tek sáýleli jaqtaryn ǵana qabyldasa eken deımin. Meıirim, mahabbat, senim sekildi máńgilik qundylyqtardy ǵana boıyna sińirse eken deımin. Meniń judyryqtaı júregim «esirtkige qarsylyǵymdy» osybir sózder arqyly ǵana bildire alady.

Qorqyt babamdaı abyzdyń, Abylaı handaı kóregen kósemniń, Baýyrjan atamdaı batyrdyń urpaǵy – bizdiń esirtkiniń quly bolýǵa quqymyz joq! Men bolashaǵyma qorqynyshsyz qaraǵym keledi, qorqynyshsyz álemde ómir súrgim keledi. Meniń tilegim – búgingi urpaq ata- babamyzdan berilgen ulttyq tárbıege qanyǵyp ósse eken dep tileımin. Ómir qandaı ǵajap!

Gúlim SERİKOVA
№277 mektep-lıseıi
Qyzylorda oblysy
Qarmaqshy aýdany Baıqońyr qalasy

---