InfoHub Logo

Pyshtanaı batyrdyń esimi atalǵanda eń birinshi oıǵa oralatyny – jeztyrnaq. El aýzynda saqtalǵan ańyzǵa sáıkes, «Ańyraqaı shaıqasy» jeńispen aıaqtalǵan soń Pyshtanaı batyr elge jalǵyz qaıtyp kele jatady. Jolda ań atyp, qalyń ormannyń shetinde ańnyń etin otqa qaqtap otyrady. Osy kezde orman jaqtan deneli úlken kisi ún-túnsiz ot basynda otyrǵan Pyshtanaı batyrǵa qarama-qarsy kelip otyrady. Otqa qaqtalyp, pisken etti batyr álgi kisige usynady. Qara qoıdyń terisinen tigilgen tondy aınaldyryp kıgen álgi adam etti almaı, basyn shaıqaıdy. Kóp aıaldamaı, ornynan turyp, kelgen jaǵyna ketip qalady. Pyshtanaı bul kisiniń jeztyrnaq ekenin bilgen eken. Sebebi, ol batyr usynǵan etti qolymen almady, saýsaqtaryn kórsetkisi kelmedi. Ún-túnsiz ketip qalady. Jeztyrnaq kózden ketken soń Pyshtanaı qorǵanýdyń amalyna kirisedi. Úlken tomardy alyp, onyń ústine syrt kıimin jabady, bas jaǵyna bas kıimin kıgizedi. Al ózi oq jetetin jerdegi bir aǵashtyń tasasyna tyǵylady. Tún ortasy bolǵanda baǵanaǵy dáý kelip, tomardy qapsyra qushaqtap, qos qolymen búrip, tyrnaǵyn batyrady. Osy kezde ańdyp otyrǵan Pyshtanaı jeztyrnaqty atyp óltiredi de, qos qolyn kesip alady. Sol tyrnaq búginde urpaqtarynyń qolynda saqtaýly. Batyr murasyn zerttep júrgen jandardyń biri Ibraımbek Tólegenulynyń aıtýynsha búginde saqtaýly jeztyrnaqtyń bir tyrnaǵynan bólek basqa da tyrnaqtary el arasynda bolýy múmkin deıdi.

«Kóptegen tarıhı derekter men ańyz-áńgimelerde babamyzdyń jeztyrnaqpen aıqasy týraly aıtylady. Bul árıne shyndyq bolýy da múmkin. Dese de ınternet materıaldaryn qarap otyryp, jeztyrnaqqa uqsas maquluqtardyń basqa qaýym, taıpalarda da bolǵanyn estımin. Múmkin bul ertedegi jabaıy adamdar ma dep te oılaımyn,- deıdi.

---