InfoHub Logo

Qazirgi ǵasyr - aqparat ǵasyry. So­nyń jetistikteriniń biri ǵalamtor jelileri jáne onyń atqaratyn kópqyrly qyzmet­teri. Jastar kórkem ádebıet oqymaıdy dep aıta almaımyz. Mektep baǵdarla­ma­syn­da qazaq, orys ádebıeti sabaqtarynda mindetti túrde oqyp, tanysýǵa tıisti   shy­ǵar­malar tizimi oqýshylarǵa beriledi.

Ǵalamtor… Eski men jańanyń, ótken men bolashaqtyń, qatygezdik pen meıirimniń, bar men joqtyń mıdaı aralasqan ortasy. Óz qasyńdaǵy oqıǵaǵa, iske, túrli taǵdyrǵa nazar salmaýyńyz múmkin, biraq ózge qıyrdaǵy qıly taǵdyrǵa kóz monshaǵyńyzdy úzesiz. Eń bastysy qandaı aqparat oqysańyz da, soǵan saı jaýap qaldyrýyńyzǵa, pikir bildirýge quqyǵymyz bar.
Ǵalamtor… Tutasqan álem. Órmekshiniń tory dersiz. Endi shynaıy súıispenshiliktiń ornyn jyltyry mol vırtýaldy mahabbat, shynaıy aralas-quralas dostyqtyń ornyn vırtýaldy syılastyq basyp keledi. Tek kógildir saǵymdy ǵalamtorlardyń ishinde san men sıfrlardyń, áldebir ataýlar men ózińe úsh qaınasa sorpasy qosylmaıtyn esimderdiń jaqynysyz… Tanysyńyzdan ajyrap, tanymasyńyzdy jaqyn tutatyn mezgil qazir. Iirimine essiz úńilgen keıbir jandar onyń tutqynyna da aınalyp úlgergen. Jalǵyzdyq pen kúızelistiń asaý tolqyndaryna jutylǵandar qanshama? Bul da bir ótpeli kezeń shyǵar. Jamandyǵyn aıtyp taýysa almaısyz, al jaqsylyǵy da ushan-teńiz. Tek sony ornymen paıdalana  bilsek, múmkindigin barynsha tıimdilikpen júzege asyryp, adamı qalpymyzdy nyqtap, bilimimizdi asyrýǵa jumsasaq.

HHİ ǵasyrdyń basty jetistikteriniń biri – mobıldilik. Búginde barlyǵy óte jyldam áreket jasaıdy. Eger burynyraqta baıaý jasaıtyn derbes kompúterdi kútip, bir qujatty daıyndaıtyn bolsańyz, qazir myqty devaıstar bul máseleni artta qaldyrdy. Ýaqyt ta tez ótetin boldy. Bir bosaǵan mınýtyńyzdy siz mindetti túrde ǵalamtordy paıdalanýmen ótkizesiz. Ras emes pe? Árıne, qazirde onyń paıdasy mol. Oqýda, jumysta, izdenýde ǵalamtor tamasha kómekshi. Alaıda, ǵalamtor «dertine» shaldyǵyp, onyń qurbany bolǵan jandar kóp. Dosyńyzben kezdesýde ózińizdi ustaı almaı, telefonǵa qarap, kelgen hatqa jaýap beresiz. Aıtyp jatqan áńgimesin tyńdamaı, bar oıyńyz smartfonyńyzǵa baǵyttalady. Shyn máninde telefonǵa sizdiń jaýabyńyz tez arada qajet emes, tipti, nazarsyz qaldyrsańyz da oǵan báribir. Al dosyńyz nazarsyz qalǵany úshin qatty ókpeleýi múmkin.

Tabysymyzǵa jeteleıtin paıdaly, sapaly aqparattardy tez arada alyp, jańa bilim sýsyndaımyz. Sol sebepti ǵalamtordy ózindik damýymyzǵa paıdalana bileıik. Áleýmettik jelige táýeldilikten arylý úshin tekserilgen tájirıbeni usynamyz. Ol - sportpen aınalysý. Er jigitter belgili bir sportpen nemese qarapaıym jattyǵýmen aınalysyp, qyz balalar bımen, júzýmen, ıoga nemese jattyǵýmen aınalysýyna bolady. Nátıjesinde - táýeldilikten arylasyz, densaýlyǵyńyzdy túzeısiz, ózińizge senimdi bolasyz.

Abaı negizgi mektebi 8 synyp oqýshysy

Kapızov Azat

 

---