InfoHub Logo

Búgin Parlament Májilisiniń jalpy otyrysynda depýtat Baqytgúl Hamenova Qazaqstan geografıasyna qatysty másele kóterip, QR Premer-Mınıstriniń orynbasary Erbolat Dosaevqa depýtattyq saýal joldady.

«Bıylǵy jyldyń basynda Májilis depýtattary óńirlerge sapar barysynda el tarıhynda izi qalǵan ǵalymdar men belgili ustazdardyń, ult janashyrlarynyń úni men nazyn estip qaıtty. Naqtyraq aıtsaq - jalpyǵa bilim berý standartynan keıin oqý  baǵdarlamasyn ázirlegen jaýapty mamandar basty jáıtti eskermeı qalǵan. Kezeń-kezeńmen engizilgen ózgerister qatarynan elimizdiń egemendigin tanytatyn pán - «Qazaqstan geografıasyn» jeke pán retinde tappadyq. Dúnıejúzindegi barlyq el ózderiniń táýelsizdigin tanytý úshin geografıasyn jeke pán retinde oqytatyndyǵy anyq. Jer kólemi boıynsha eń kishkentaı memleketterdiń ózi bul tizimniń aldynda. Al Qazaqstan Respýblıkasy 193 memlekettiń ishinde 9-oryndy ıelengen», - dep toqtaldy depýtat.

Osy oraıda ol Reseı, Qyrǵyzstan, Ózbekstan elderi tól geografıasyn meńgerýdi úsh jylǵa jýyq ýaqytty qamtyp otyrǵanyn atap ótti.

«Bizde Qazaqstan geografıasy 1993 jyldan bastap mektep qabyrǵasynda oqytylyp keledi.  Aptasyna áýpirimdep oqytatyn eki saǵattyń ózi búginde kózden bulbul ushqaly tur. Elbasy N.Á. Nazarbaevtyń «Bolashaqqa baǵdar: rýhanı jańǵyrý» maqalasynda: «Týǵan jerdiń árbir saıy men qyrqasy, taýy men ózeni tarıhtan syr shertedi. Árbir jer ataýynyń tórkini týraly talaı-talaı ańyzdar men áńgimeler bar. Ol úshin «Qazaqstannyń qasıetti, rýhanı qundylyqtary» nemese «Qazaqstannyń kıeli jerleriniń geografıasy» jobasy kerek  dedi. Elimiz ben jerimizdiń tarıhy men geografıasyn tereń tanytý Elbasynyń aldymyzǵa qoıyp otyrǵan naqty baǵyty. Bizde standart pen baǵdarlamany attap ótip, oqýlyq shyǵarý sánge aınalǵan ba? Sózimizge dálel, bıylǵy oqý jylynan bastap «Geografıa» degen ataýmen jańa oqýlyq engizilgen. Al «Qazaqstan geografıasy» joq. Bul oqýlyqtyń da elimizdiń tól geografıasyn nasıhattaýǵa qanshalyqty qyzmet etetini kúmán týdyrady. Buqaralyq aqparat quraldary betterine bergen málimdemesinde mınıstr Erlan Saǵadıev myrza atalmysh máseleden beıhabarlyǵyn tanytsa,  mınıstrlikten alynǵan resmı jaýapta «Búgingi kúnge deıin «Qazaqstan geografıasy» pán retinde emes, oqý baǵdarlamasy» esebinde ǵana qaralǵan degen   jaýap aldyq. Jaýapty basshylyqtyń jaýaby osyndaı  túsiniksiz bolsa, jańa  oqý baǵdarlamasy men jańa oqýlyqtyń shıkiligi de aıqyn ba dersiń», - dedi B. Hamenova.

Onyń paıymynsha, basty maqsat  - bolashaq urpaqqa Atyraý men Altaıdyń arasyn jalǵap jatqan keń baıtaq atyraptyń qasıetin ulttyq muratta túsindirý. Elbasynyń eren eńbegi ózgelermen astasqan Qazaq eliniń aýmaǵy men shekarasyn «Qazaqstan geografıasynda» oqytý mańyzdy.

«Joǵaryda aıtylǵan jaılardyń negizinde Bilim jáne ǵylym mınıstriniń shyǵarǵan oqý baǵdarlamalaryn qaıta qaraýdy usynamyz. Saǵaty bolǵanymen, eshqandaı buıyryqsyz aýystyra salynǵan «Qazaqstan geografıasy» pániniń ataýy oqý baǵdarlamasynda saqtalýy tıis. Búginge deıin osy salada izdenip, aıtarlyqtaı zertteý jumystaryn júrgizgen, qajetti oqýlyqtar shyǵarǵan ǵalymdardyń jumysy da eskerilý qajet. Jańa oqý baǵdarlamasy boıynsha  jańa oqýlyqtar shyǵarýdy jeleý etip, búdjet qarajatyn talasqa túsirmeı, bar ádebıetterdi paıdalanýymyz kerek. Óz tarıhy men óz jeriniń qasıetin urpaqqa uǵyndyrý - bizdiń paryzymyz. Jańashyldyq penen aqparattyq keńistikke bet bura otyryp, táýelsiz qazaq eliniń óz muraty, tarıhy, pánderi bolýy shart», - dep túıindedi sózin depýtat.

QazAqparat

---