InfoHub Logo

Germanıanyń bilim júıesi kúrdeli. Kem degende 4 túrli mektep bar. Bastaýysh mektepten keıin balalardy qabiletine qaraı ár mektepke bóledi.

Nemis mektepterinde 1 — óte jaqsy baǵa bolsa, 6 — eń nashar baǵa. Bastaýysh mektepten keıin oqýshylardy úlgerimi men tártibine qaraı jaı mektepter men gımnazıalarǵa bólip tastaıdy. Al ýnıversıtetke tek qana gımnazıa oqýshylary túse alady. Germanıada joǵary bilim tegin beriledi.

Ýnıversıtetterde arnaıy bekitilgen baǵdarlamalar joq, stýdentter óz kýrstarynyń baǵdarlamasyn birlese jasaıdy. Akademıalyq bostandyq sabaqtarǵa kirmeýge, kýrs baǵdarlamasyn ózgertýge, óz betińmen daıyndalýǵa, qosymsha sabaqtarǵa qatysýǵa múmkindik bergen. Ýnıversıtetke túsý úshin eshqandaı emtıhan qajet emes, nemis tili men aǵylshyn tilin jaqsy meńgergendigi týraly qaǵaz ótkizilse jetip jatyr.

Keıbireýleriniń ýnıversıtetke túsý joly óte uzaq bolady. Qabilettileri gımnazıadan keıin birden túsip kete alady. Biryńǵaı testten árqaısysy ótýge mindetti.

Osydan 6-7 jyl buryn «Bakalavr» men «Magıstratýrany» engizdi. Qazir modýlmen oqytady. Ýnıversıtette árkim óz josparyn ózi ázirleıdi.

Sheteldik ýnıversıtet qazaqstandyq JOO-lardan ereksheligi erkindigimen erekshelenedi. Ózińe qajet nárseni óz erkińmen oqısyń. Sesıada esse jazatyn bolsańyz, ıa referat daıyndasańyz, taqyrypty semınarǵa baılanysty tańdaýǵa quqyǵyńyz bar. Tipti emtıhan túrin, ýaqytyn da ózińiz belgileı alasyz. Sesıany semestrdiń alǵashqy aptalarynda da jaýyp tastaý múmkindigińiz bar.

Emtıhan túri 15-25 bet esse jazý, 30-90 mınýtqa deıin aýyzsha referat prezentasıasy nemese aýyzsha emtıhan.

Keıbir profesorlar aldyn ala qansha kitap qoldaný kerek ekenin aıtady. Jáne de mundaǵy ýnıversıtetterde túrli jaqsy jaǵdaılar jasalǵan. Mysaly: kitaphananyń baılyǵy, kitaphanada ınternet arqyly Germanıa boıynsha kitapqa tapsyrys berý múmkindigi, dúnıe júzindegi úzdik ǵylymı derekqorlarǵa erkin kirý múmkindikteri, magıstratýralyq dısertasıa jazýǵa arnalǵan kishkentaı, bir adamdyq bólmeler, ózińmen alyp júretin kiltti kishkentaı jeke shkaftar, cporttyń túr-túri. Jaqsy oqýǵa ýnıversıtet tarapynan bar jaǵdaı jasalǵan. Tipti balaly stýdentterge arnaıy balabaqsha da bar.

---