InfoHub Logo

Ashshy qońyraý qysqa zyń ete qaldy. Jeńil basyp kelip kiltke qolyn sozǵan ol sál kidirip, "Kim bul?" dep surady da jaýap kútpesten esikti asha saldy. Onalty-on jeti shamasyndaǵy uzyn boıly sary bozbala.

— Sálemetsiz be, — deıdi.

— Sálem. Kel, kir.

Túpki bólmege ótken kelinshek oramal, qaıshy, taraq alyp keldi.

— Mynda otyr. Qalaı kesemiz?

— Qysqa. Art jaǵynan kelip aınaǵa oılana qadalǵan ol ernin tistedi.

— Jeıdeńdi shesh.

Ornynan turyp kónbis keıippen sheshine bastaǵan bozbalaǵa qarap, "eger men erkek ol kishkentaı qyz bolsa, sheshinbes edi" dep oılady. "Qyz bala on jastan keıin áıel, al bular jıyrmaǵa kelse de sábı". Moınyn oramalmen jaýyp, sırek qońyr shashyn kesýge kiristi. Edendegi beımálim núktege qadalǵan bala únsiz.

— Mamań qalaı?

— Jaqsy.

— Jumysta ma?

— Iá.

Taǵy únsiz qaldy. Tek qalqıǵan qulaqtary ǵana qyp-qyzyl.

— Boldy ǵoı deımin. Qalaı?

— Jaqsy. Raqmet.

— Bir jeri durys bolmasa qazir aıt. Keıin kesh bolady.

— Joq. Bári durys.

Moınyna jabysqan maıda shashtardy qaǵyp, vana jaqty nusqady. Ol jyly sýdy qosyp basyn jýa bastaǵan.

— Jaqsylap shaı. Ásirese moınyńdy.

Syrtynan balanyń ebdeısiz qımyldaryn baǵyp az turdy da, shydaı almaı janyna baryp moınyna sý quıa bastady. "Arqań da shash". Aryq, qýshıǵan ıyqtaryna jabysqan shashtardy ketirdi.

— Boldy.

Qolyna súlgi ustatqan ol dálizge ótip, qaıshy-taraǵyn tazalady. Aına aldynda qalǵan oryndyqty qaıta as úıge aparyp qoıdy.

— Kıinip te úlgerdiń be?

— Iá, men qaıtaıyn, — dedi ol.

Tik qaramaı kózderin ala qashady.

— Shashyndy taramaısyń ba?

— Joq, kepsin.

Áıel jymıdy.

— Meıli onda. Óziń bil.

— Saý bolyńyz.

— Saý bol. Mamańa sálem aıt. Oı, toqta, konfet bereıin.

— Joq, raqmet. Mende bar.

Bala nege ekeni túsiniksiz qaltasynan konfet shyǵaryp kórsetti. Sodan soń jerde shashylyp qalǵan shashtarǵa kózi túsip qyzaryp ketti.

— Esh nárse etpeıdi. Qazir ózim jınap alamyn. Saý bol.

Áıeltaǵy jymıdy.

— Saý bolyńyz.

Tekpeshektermen tez sekirip túsip bara jatyp bozbala júregin alaburtqan túısikke yzalandy. Dalaǵa shyqqan soń bar kúshin salyp júgire jónelgen.

---