InfoHub Logo

«Ysqyrmanyń» shyǵý tarıhy da aıta qalǵandaı. Dáýletkereı tóre tuqymyna laıyqsyz bolsa da, atyn minbeı, aýyl syrtynda jaıaý serýendegendi táýir kóredi eken, sondaı serýenge shyqqan bir kúni kele jatyp birdeńe dep kúbirlegendeı bolady. Qasyndaǵy serigi «o ne?» dep eleń ete qalyp edi, kúıshi basyn shaıqaı, «úndeme» degendeı ısharat bildirdi. Dáýletkereı sosyn balalar qusap ysqyra bastady. Bul qylyq, árıne, «Shyńǵystyń áýletine» tym ersi edi. Onyń ústine qazaqtar ysqyrǵan ádepsizdik belgisi dep sanaıdy. Dáýletkereı qasyndaǵy seriginiń abdyrap qalǵan túrin kórip jymıdy da, birdeńege qýanyp asyqqan adamsha úıine qaraı tez-tez adymdaı jóneldi. Serigi eshteńege túsinbegen qalpy ıyǵyn bir qomdady da, sońynan erip júre berdi. Úıge kelip Dáýletkereı qolyna dombyrasyn aldy da, jańa kúıdi sherte jóneldi. Mýzykany jaqsy túsinetin quımaqulaq joldasy kúı sarynynan baǵana ádepten attap, aıdalada ysqyryp salǵan úzik-úzik áýenniń sazyn birden aıyrǵan. Zerdesine kelgen kúıden úıge jetkeninshe aırylyp qalmaı pernege túsirgenine qýanǵan Dáýletkereı, bul kúıge «Ysqyrma» dep at qoıdym deıdi joldasyna.

 

---