InfoHub Logo

Búgingideı jahandaný zamanynda bilim men ǵylym qashanda birinshi orynda. Memleketimizdiń damyp, jetilýi úshin sapaly bilimniń kilti ǵana bolashaqqa jeteleıdi. Arman men maqsat úndesken tusta, tańdaý men talǵamnyń orny bir bólek. Meniń tańdaýym Qazaqstandaǵy JOO-nyń kósh basy ál-Farabı atyndaǵy Qazaq Ulttyq Ýnıversıteti boldy. Basty armanym osy ýnıversıtettiń qabyrǵasynda bilim alyp, stýdenttik jyldarymnyń qyzyqty kúnderin ótkizý edi. Allaǵa shúkir! Bul kúnde armanym oryndalyp, óz bıigine de jetti. Ál-Farabı atyndaǵy QazUÝ – erekshe mártebesi bar Qazaqstannyń jetekshi klasıkalyq ýnıversıteti, kásibı bilim men ǵylymdy ınovasıalyq damytýdyń ulttyq kóshbasshysy, elimizdiń joǵary oqý oryndary arasyndaǵy birinshi Qazaqstan Respýblıkasy Prezıdentiniń «Sapa salasyndaǵy jetistikteri úshin» syılyǵynyń ıegeri. Ýnıversıtette 15 fakúltet bar jáne 180 sala boıynsha mamandar daıarlaıdy. Meniń fakúltetim – Fılologıa jáne álem tilderi fakúlteti, fakúltette talaı tanymal, daryndy túlekter túlep shyqqan. Atap aıtar bolsaq: Muhtar Áýezov, Zeınolla Qabdolov, Ábish Kekilbaev, Dýlat Isabekov, Nurlan Orazalın, Tursynbek Kákishev, Rymǵalı Nurǵalı, Máýlen Balaqaev, Sultanǵalı Sadyrbaev, Gúlnar Dýsmatova, Balǵynbek Imashev, Muhamedjan Tazabekov, Janna Qýanysheva t.b. Fakúltetimiz ýnıversıtet ishinde «ekinshi óner ordasy» degen ataq alǵan. Oǵan sebep barlyq sharalardy utymdy uıymdastyryp, bilim men óner saıysynyń nátıjesinde stýdentter qaı kezde de birinshi orynda tur. Bizdiń kafedramyz – «Jalpy til bilimi jáne eýropa tilderi» kafedrasy. Ýnıversıtettiń sheteldegi bilim ordalarymen baılanysy men qarym qatynasynda kafedranyń úlesi zor. Kafedrada teorıa men tájirıbeni oraılastyrý maqsatynda birneshe ǵylymı úıirmeler uıymdastyrylǵan. Qazirgi tańda meniń meńgerip jatqan mamandyǵym Shetel tili: Eki shet tili, akademıalyq bilimniń bakalavr deńgeıin kórsetetin joǵary bilikti mamandyqtardyń biri bolyp tabylady. Jalpy eki shet tilin birdeı meńgerip shyǵarýdaǵy maqsattardyń biri elimizdegi úsh tildi jetik mengergen azamattarymyzdyń retin kóbeıtý, sondaı-aq, ózge eldermen qarym-qatynas tilderin elde barynsha damytý. Shetel tili: Eki shet tili mamandyǵynyń oqytý baǵdarlamasy negizinen pedagogıkalyq baǵytqa kóp kóńil bóledi. Sol sebepti osy mamandyqty alyp shyqqan bitirýshiler kóbine ustaz bolyp qyzmet atqaryp júr. Men bıylǵy jyldyń naýryz, sáýir aılarynda Atyraý oblystyq Daryndy balalar mektep-ınternatynda pedagogıkalyq tájirıbeden óttim. Onda aǵylshyn tilinen 6-7-synyptarǵa sabaq berdim. Pedagogıkalyq tájirıbede ustazdarymnan alǵan bilimimdi saralap, nátıjeli bolýy úshin tyndyrymdy eńbek atqarýǵa tyrystym, ashyq sabaqtarymda jańashyl ádis-tásilderdi qoldandym. Balalarmen tyǵyz qarym-qatynas jasap, « Meniń bolashaq mamandyǵym» taqyrybynda dóńgelek ústel jáne birneshe trenıńter ótkizdim. Búgingi sapaly bilim – erteńgi jarqyn bolashaq. Bilim berý júıesindegi ózgeristerdiń oń nátıje berýi úshin , muǵalimderdiń aıanbaı ter tógýi qajet! Elbasymyz «Qazaqstannyń bolashaǵy – jastardyń qolynda» degen, olaı bolsa jumyla kótergen júk jeńil, men de Qazaqstannyń bolashaǵyna, qazaq biliminiń órkendeýi jolynda qolymnan kelgenshe eńbek etemin!

Myrzahmetova Janar Muratqyzy,

QazUý fılologıa ádebıettaný jáne álem tilderi fakúlteti 3-kýrs stýdenti.

Praktıka jetekshisi: Álıakbarova Aıgerim Tilesbekqyzy

---