InfoHub Logo

Baǵanaly Sandybaıdyń Erdeniniń balasy qaıtys bolǵanda Yqylas óziniń «Erden» dep atalyp ketken jubatý kúıin tartqan. Sol joly Yqylastyń arqaly ónerine tánti bolǵan Erden Tamalardyń barymtalanǵan jylqysynyń qaıtarylýyna sebepshi bolǵan ǵoı. Oǵan qosa Yqylastyń alǵash ret alys-jaqyndaǵy bas kóterer bilikti adamdarǵa tanymal bolatyny da osy kez. Tama rýynyń ıgi jaqsylaryna olja salyp, óz aǵaıyndarynyń arasynda da zor bedelge jetken.

Osy sapar Yqylastyń qanatty ónerine tánti bolǵan Erden syı-qurmet kórsetip, astyna at mingizedi, ıyǵyna shapan jabady.

Sodan ulytaýdaǵy Erden aýylynan kóńilderi kóterińki attanǵan Tama eliniń adamdary Sarysý boıyndaǵy qonysyna erterek jetýge asyǵyp, sýyttaý júrse kerek. Sol sýyt júriske shydamaı, Yqylastyń Erden aýylynan syıǵa mingen aty aqsap, qoldaýy sógilip qalady. Bul toptyń ishindegi eń jasy Yqylas bolǵan soń úlkender jaǵy ázildep: «Áı, Yqylas, osy seniń qobyzyńnyń daýasy kúshti bolyp tur. Jalǵyzynan aıyrylyp, jer baýyrlap jatqan Erdenniń qaıǵysyn seıiltip, basyn jerden kóterttiń. ol az degendeı, Erdenniń kóntaqym urylary áldeqashan sińirip ketken malymyzdy qaıtarttyń. Endi myna Erdennen mingen pyraǵyńnyń janyn qınamaı, sol qobyzyńnyń ónerin taǵy kórsetip, bir shıpa keltirmeısiń be», — deıdi. Uzyn jolda erigip kele jatqandarǵa ermek kerek, basqalary da álgi sózdi qoldap, keý-keýlep ketedi.

Sonda Yqylas jasy úlken aǵalarynyń sózin ázil de bolsa jerge tastamaı, at ústinde kele jatyp qobyz tartady. Saryny da, yrǵaǵy da bólek sony saz álginde ǵana ázildep kele jatqan úzeńgilesterin eleń etkizedi. Kúı erkeleı tolqyp, syrǵı sozylyp baryp aıaqtalǵanda tyńdaýshylary: «Óı, mynaýyń tyń saryn boldy ǵoı!» — dep tańdanys bildiredi.

Sonda Yqylas baǵanaǵy ázil sózge ázilmen jaýap qaıyryp: «Endi qaıteıin, ıen dalada erimdi arqalap jaıaý qalar jaıym joq. Myna aqsaq atyma shıpa bolsyn dep tartqan kúıim ǵoı!» degen eken.

Keıin bul kúıi el ishine «Jalǵyz aıaq» degen atpen tarap edi deıdi.

---