InfoHub Logo

Ál-Farabı atyndaǵy Qazaq Ulttyq ýnıversıtetiniń Tarıh,  arheologıa jáne etnologıa fakúlteti  2010 jyldan beri «Muraǵattaný, qujattaný jáne qujattamamen qamtamasyz etý» mamandyǵy negizinde bakalavrıat, magıstratýra boıynsha  mamandar daıarlaıtyn elimizdegi jalǵyz fakúltet. Sonymen qatar, bul mamandyq boıynsha Doktorantýraǵa 2017 jyly №0137355 lısenzıa alynyp,  qabyldaý 2019 jyly  júzege asyryldy. Atalmysh mamandyqqa 5 memlekettik grant bólindi.

Muraǵattaný, qujattaný jáne qujattamamen qamtamasyz etý mamandyǵy boıynsha bilim berý doktorantýrasynyń negizgi mindetteri:

- arhıv isi  jáne qujattaný salasynda PhD doktorlaryn daıarlaý;

-  arhıvtaný men qujattaný boıynsha teorıalyq bilim deńgeılerin kóterý;

- arhıv isi jáne qujattaný salasy boıynsha ǵylymı ádebıetterdi paıdalaný daǵdylaryn jetildirý;

- ǵylymı pánaralyq baılanystardyń ádisterin ıgerý;

- muraǵatshylar men qujattanýshylardyń kóshbasshylyq qabilettilikterin qalyptastyrý jáne ǵylymı jobalardy júzege asyrý;

Muraǵattaný, qujattaný jáne qujattammen qamtamasyz etý mamandyǵynyń doktoranttaryna aqparattyq tehnologıalarǵa baılanysty  «Arhıvtaný jáne qujattanýdaǵy aqparattyq júıeler» jáne «Elektrondy qujattardyń metamálimetterin basqarý» kýrstary boıynsha tehnıka ǵylymdarynyń doktory, profesor Japarov Borıs Álikenuly dáris oqydy. Arhıv isi salasynda ózekti máselelerdiń biri elektrondy qujattar men aýdıovızýaldy komýnıkasıalar týraly «Aýdıovızýaldy jáne elektrondy qujattar arheografıasynyń problemalary» jáne  «Qazirgi álemdegi aýdıovızýaldy komýnıkasıalar» kýrstary boıynsha tarıh ǵylymdarynyń doktory, profesor Seksenbaeva Gúlzıra Ashımhanqyzy dáris oqysa,  kóshbasshylyq qabiletti damytý boıynsha  «Basqarý isin modeldeý» kýrsyn tarıh ǵylymdarynyń doktory, profesor Jakısheva Saýle Aýkenqyzy dáris oqydy.

 «Muraǵattaný, qujattaný jáne qujattamamen qamtamasyz etý» mamandyǵynyń doktorantýrasyna túsken doktoranttarymyzdyń doktorlyq dısertasıalarynyń taqyryptary arhıv isiniń ózekti máselelerin qamtýǵa baǵyttalǵan. Atap aıtsaq «Prezıdent Arhıviniń partıalyq qorlaryndaǵy “erekshe papkalardyń” qujattary»,  «Qazaqstan Respýblıkasy arhıvterindegi jeke tektik qorlar: qalyptastyrýdyń ǵylymı negizderi», «Qazaqstandaǵy 1918-1991 jj. arhıv organdarynyń  qyzmeti» taqyryptary tańdaldy. Bul tańdalǵan taqyryptar boıynsha Partıaǵa qatysty qupıasyzdandyrylǵan qujattar týraly jáne elimizge eńbegi sińgen tanymal tulǵalardyń jeke tektik qujattary, sonymen qatar arhıv organdarynyń qyzmeti týraly máseleler zerttelinedi. Al qujattaný salasynda «Memlekettik organdarda elektrondy qujat aınalymyn engizý tájirbıesi men basqarý tıimdiligi» taqyrybynda Almaty qalasy ákimdiginiń qoldanysyndaǵy elektrondy qujat aınalymynyń  tájirbıesi týraly másele qarastyrylsa, pánaralyq baılanysta «Kitaphanalar sıfrlyq aqparattyq keńistikte:  eýropalyq jáne otandyq tájirbıe»  taqyryby alyndy.

Elimizde ejelgi dáýirden qazirgi zamanǵa deıingi kezeńdi qamtıtyn barlyq otandyq jáne sheteldik muraǵattar dúnıesine eleýli irgeli zertteýler júrgizý úshin «Arhıv-2025» baǵdarlamasy iske qosyldy. Bul baǵdarlamany iske asyrýda arhıv is mamandarynyń atqaratyn qyzmeti zor. Sonymen qatar elimizdiń ekonomıkalyq, mádenı, saıası tarıhyna qatysty jazba derekterimizdi saqtaıtyn muraǵattanýshy mamandyǵynnyń doktoranttaryn daıarlaý arhıv isi men qujattanýdyń ǵylym retinde damýyna tıgizetin áseri mol.

Tólebaev T.Á. - t.ǵ.d., ál-Farabı atyndaǵy Qazaq Ulttyq ýnıversıtetiniń profesory

Maksymkanova A.H. - ál-Farabı atyndaǵy Qazaq Ulttyq ýnıversıtetiniń 1 kýrs PhD doktoranty

---