InfoHub Logo

Ústel shyraqtyń astyna ǵana túsip, aınalasyna taraǵan qyzǵylt-sary tústi elektr jaryǵy shaǵyn bólmeniń ishine romantıkalyq ár berip tur. Appaq kórpe-jastyqtar tóselgen jumsaq tósek ústinde men onyń sulý músinine yntyǵa qaraımyn. Jyly jymıyp, erkeleı kelip moıynyma asylady. Júzinde nur balqyp, kózi kúlimdep, erini erinime jabysady...

Yntyǵa aımalasý, ystyq súıispen qansha ýaqyt ótkenin de bilmeppiz. Mana, keshke men osy qalaǵa at basyn tiregende, ol avtobeketten kútip alyp, aldyn-ala ózi daıyndap qoıǵan osy shaǵyn páterge ertip kelgen. Sodan beri bir-eki shyny ystyq shaı ishkenimiz bolmasa, ermegimiz osy.

Men ony súıetin edim. Osyǵan deıin tek úsh-aq ret kezdessek te, túndi túnge, tańdy tańǵa jalǵap telefon arqyly syrlasyp júrdik. Endi jańajyldaǵy demalysymdy paıdalanyp, taǵy bir kórip ketýge kelip turmyn. Telefonnyń arǵy jaǵynda turyp-aq janymyz erip keterdeı edi, kezdeskendegi ynta tipti bólek boldy. Kezdesken sátten-aq qushaǵyma qulaǵan...

Mine túnge taqady. Appaq qarmen shaǵylysqan Aı nury juqa torǵyn perdeden bólme ishine sútteı jaryq sáýle sebedi. Páter ishi tátti sózder, ystyq súıis, názik kúlkige toly.

Ol úı-ishine qurbysymen jańa jyl keshin ótkizemin, keshke kelmeımin depti. Bir kezde telefon qońyraýy shyldyrlady. Ol: «Týý, mamam» dedi de, suq saýsaǵyn erinine tıgizip, maǵan úndemeı otyrýymdy eskertti. Men jymıyp qoıdym da únsiz otyra berdim.

— Týý, Mam, nege zvandaı beresiz?! Mende bári jaqsy ǵoı, Jazıkonyń úıindemin, — dep erkeleı kúldi. Men bul kúlkige ǵashyq edim, — Aıkolar ne istep jatyr? Salút attyńdar ma?.. Pa tipti, onda ne tur? Shyrsha ne boldy? — dep sol názik kúlkisimen búrkemelep, boıyn bılegen qobaljýyn basyp, áńgimeni basqaǵa buryp áketti. Kúmis syńǵyryndaı syrly kúlkisi men áýendi nazdy sózi kimniń bolsa da esinen tandyrǵandaı.

Sońynda: «jaraıd, mam, tańerteń baram, alańdamaı uıyqtaı berińder» dep tutqany qoıdy. Bul sátte ol jartylaı jalańash edi, keýdesin qolymen kóldeneń basyp otyrǵan. Appaq almasy bileginiń ústinen tyrsıyp, doǵalanyp shyǵyp tur. Anasymen áńgimeden soń, bilegin keýdesinen almaǵan kúıi maǵan qaraı jaqyndady...

Birneshe kún erýlep, jańa jyldy ótkerip, men óz qalama qaıttym. Bir aıdaı ýaqyt ótken, keıde sol bir túndi saǵyna eske alsam, keıde kókeıimdi muń mekendep alatyn. Kúndelikti qabarlasyp, syrlasyp júrsek te, sońǵy kezde tildesýimiz azaıa bastaǵan. Bir kúni túnge qaraı qońyraý shaldym. Birshama ýaqyt kúttirip, qyz tutqany kóterdi. Arǵy jaqtan tarsyldap, dúrsildegen mýzyka dybysy estiledi.

— Alo! Alo!

— Aloo, prıvet!

— Sálem! Ne dybys anaý? Toıda júrsiń be?

— Klýb qoı, qurbymnyń týǵan kúni.

— A, qaıt erterek...

— Iá, qaıtam ǵoı, óziń ne istep jatyrsyń? — dep meniń qal-jaıymdy surap, biraz sóılesip qaldyq. Alǵash mýzyka daýysynan sál ashýlanyp qalǵan edim, jyly sózi ashýymdy tarqatyp, janymdy jaılandyrǵandaı boldy. Onyń ústine ásem kúlkisi de qatar estilip, janymdy eljiretip bara jatty. Kenet meniń esime jańa jyl túni tústi, sondaǵy osy kúlkisi, sol sáttegi jartylaı jalańash beınesi elestedi... Kóńilim alaburtqan kúıde tutqany qoıdym.

Osydan keıin kóp ótpeı qabarsyz kettik...

---