InfoHub Logo

Bir májiliste Birjannyń «Janbota» áni shyrqalyp aıtylǵan edi, ishinde Ybyraı men Suraǵan ánshiler bar edi.

— Apyrym-aı, Aznabaıdyń poshtabaıyna bir zaýal bolmady ma eken? — degen suraý týyp qalyp edi, sonda Ybyraı julyp alǵandaı — pálı poshtabaıǵa, sol jıynda dúre soǵylyp, bir at-shapan tólenipti, — dedi.

— Bir qarıa otyryp, İbekeńdiki durys, men de osylaı esitip edim dedi. Biraq, Ybyraı áńgimeni odan ári jalǵap, «Janbota» ániniń qalaı shyqqanyn, Aznabaı men Janbota arasynda qandaı janjal týǵanyn Birjannyń óz aýzynan estigenin jáne Orekeńnen, Shyńǵys balasy Jaqyptan taǵy birneshe ishinde bolǵan adamdardan esitip-bilip, Janbota Birjan týraly áńgimeni men ózim Órekeń balasy Omardan, Tilembaıdyń Ospanynan, Baǵasynyń Nazarynan, Serdaliniń Jámshıshinen estigen edim, sol estigen áńgimelerdiń túıini joǵarǵy Ybyraı aıtqan shyndyqqa soǵady. Aǵasultandyq joıylyp Kókshetaý ýez bolǵan zamanda, bolystardyń, bılerdiń bas qosqan úlken jınalysy Kókshetaý qalasynyń dál jelkesindegi, Qylshaqty ózeniniń boıynda ótipti. Ol jerde ulyqtar túsetin qyzyl úı bar eken. Elden kelgender kıiz úılerdi, soıys maldardy, kóshirip ákelip ózen jaǵasyna ornatyp tastapty. Sol jıynǵa Atyǵaı, Kereıdiń bolysy Janbota qasynda bir top nókeri, ataqty ánshi, Birjan sal da kelipti. Ár bolystyń myqtylary osylaı kelip ózine tigilgen arnaýly úıge túsipti. Birjan qalyń jıynnyń bir bólegin ózinin, shyrqaǵan ánimen jıyp alyp, bosatpaı, bastalatyn bir bólek májiliske bóget jasapty. Qyldy Qaraýyldyń bolysy, Aznabaıǵa májiliske jurtty túgel jınap keltirý tapsyrylypty. Aznabaı poshtavoıyn jumsap, jurtty shaqyrtsa, Birjan dýmandy qyzdyra berse kerek. Poshtavoı eki ret sózin tyńdata almaı, bolysqa qaıtyp barǵanda, Aznabaı ashýlanyp, — buıryqty nege oryndamaısyń — dep, úıden boqtap shyǵarypty. — Birjan degen qaıdan shyqqan qudaı toqtatpaısyń ba dep, poshtavoı osy betimen bara Birjannyń dombyrasyn tartyp alyp, qamshymen uramyn degen jerinen jurt aıyryp alypty. Otyrǵan jurt poshtavoıdyń bul qylyǵyna yzalanyp, Birjanmen birge namys qylyp, buǵan Atyǵaı — Kereı qosyla uran shaqyrypty. Úlken janjal týyp ketedi. Mine, osy ashý-yzanyń ústinde Birjan óziniń bolysy Janbotaǵa kelip ókpe nazyn, poshtavoıdan kórgen qorlyǵyn aıtypty, ol jerde Birjannyń aıtqan óleńi kóp deıdi. Atamyzdyń jáne Ybyraıdyń aıtýyna qaraǵanda án dál sol janjal ústinde emes, keıinirek shyǵarylyp taralsa kerek. Birjannyń jáne qalyń Atyǵaıdyń, Qaraýyldyń bolysyna degen mundaılyq ashýly narazylyǵy Janbotaǵa da ońaı tımegen. Onda óziniń eldiń yńǵaıymen Aznabaıǵa qarsy salmaq salyp, — myna buzaqy poshtavoıyn tıa ma, tımasa Atyǵaıdyń qoly bos turysatyn jerin aıtsyn, — depti. Aznabaı jaǵyn qoldaýshylar az bolyp, janjaldyń arty nasyrǵa shabatynyn sezip Aznabaı amalsyz bitimge kelipti. Poshtavoıǵa dúre soqtyryp, bir at, bir shapan aıyp tólepti. Aznabaı osy jıynda poshtavoıynyń buzaqylyǵynan opyq jep onyń, ústine artynan Birjannyń óleńi elge taralyp ketip, kópke deıin Atyǵaı — Kereıdiń bir qatar adamdarymen, Birjanmen araz bolyp júrse kerek. «Janbota» áni týraly munyń burynǵy qarıalardan esitip esimde qalǵany osylar. Men ózim Ybyraıdyń aıtqanyna, atamyz Omardyń aıtqandaryna ımandaı senem. Sol sengendigimnen bul aıtqandarym túgel shyndyq dep bilem.

Jazyp bergen Erjanuly Moldahmet

---