InfoHub Logo

Búgin metropolıtenniń Almaly beketinde T.Júrgenov atyndaǵy Qazaq ulttyq óner akademıasynyń uıymdastyrýymen qolóner kórmesi qala turǵyndaryna usynyldy.
 

Shara barysynda óner akademıasynyń Tárbıe isi jónindegi prorektory Ergóbek Shyńǵys Qulbekuly: «Búgingi shara Elbasynyń «Bolashaqqa baǵdar: Rýhanı jańǵyrý» jáne tórtinshi óndiristik revolúsıalyq jaǵdaıyndaǵy Qazaqstannyń órkendeýine baǵyttalǵan. Elbasymyz atalǵan taqyrypty qozǵaı otyryp, eń negizgi erekshelik retinde ulttyq ónerge basa nazar aýdarǵan bolatyn. Sondyqtan da shyǵarmashylyq kórme Elbasy joldaýyn qarapaıym emes, barsha adamzatty biriktiretin ortaq, ári qýatty «óner tilimen» jetkizbek. Qoǵamdy etıkalyq, estetıkalyq turǵyda baıytý – Ulttyq óner akademıasynyń basty maqsaty. Bul mısıany akademıa ujymy, talanttary óz deńgeıinde atqaryp keledi», – dedi.

Kórmege stýdenttermen qatar, QR keskindeme jáne músin óneriniń maıtalmandary B.Dosjanov, J.Qaırambaev, Q.Ospanov, M.Júnisbaev, B.Turǵynbaı, B.Baıdilda, S.Taınov, A.Abjanova syndy óner qaıratkerleriniń jumystary qoıylǵan. Qolóner sheberleriniń týyndylary ulttyq qundylyqty, salt-dástúrimizdi dáriptep tur. Ásirese, B.Baıdildanyń «Batyr Baýyrjan» mozaıkasy, B.Dosjanovtyń allúmınııden jasalǵan «Kerýen», Uzaqbaı Asylannyń «Baqsy» músini jáne Dáýrenbek halyq nazaryn aýdardy.

Sharanyń ótkizilýine úles qosqan Almaty metropolıteniniń baspasóz hatshysy Igor Sahar: «Jylda metro beketinde 30-ǵa jýyq túrli kórnekti sharalar ótkizilip turady. Máselen, Baıqońyr beketinde kitap kórmesiniń festıvali qolǵa alyndy. Al búgin biz T.Júrgenov atyndaǵy ulttyq óner akademıasynyń túlekterimen birlese ulttyq ónerge baǵyttalǵan qolóner kórmesin uıymdastyryp otyrmyz. Osy tektes is-sharalar jastardy patrıottyq sezimge úndep, ónerge degen súıispenshilikti arttyratyndyǵyn» aıtty.
 

Kórmede qolóner týyndylarynan bólek, «Alataý» etnografıalyq ansambili Túrkeshtiń «Kóńil ashar», Nurǵısa Tilendıevtiń «Ata tolǵaýy», Ábdimomyn Jeldibaevtyń «Erke sylqym» syndy kúılerin oryndap, shara merekelik konsertke ulasty.

Araı JUMATAI, 

Ál-Farabı atyndaǵy QazUÝ,

Jýrnalısıka fakúlteti, İİ kýrs

---