InfoHub Logo

Pedagogtar men ata-analar Kundelik.kz júıesimen jumys isteý kúrdeli ekenine shaǵymdanýda. Bul týraly QR Úkimet basshysynyń orynbasary Erbolat Dosaevqa joldaǵan saýalynda depýtat Aızada Qurmanova aıtty.

 «Jaqynda Bilim jáne ǵylym mınıstrligi keń jolaqty ınterneti bar mektepterde tek elektrondy jýrnaldar toltyrylatynyn málimdedi. (...) Elektrondy jýrnaldardy saqtaý uzaq merzimdi túrde saqtaý úshin rezervtik kóshirme júıesin talap etedi. Qazirgi kezde mektepterde osyndaı jaǵdaı joq. Sonymen qatar elektrondy jýrnaldardy saqtaýdyń nusqaýlary men erejesi de eskerilmegen. Árbir toqsannyń sońynda elektrondy jýrnaldardy basyp shyǵarýdyń ózi tıisti shyǵyndardy týdyrady. Sáıkesinshe, osy sharalarǵa mektepterde búdjettik qarjy qarastyrylmaǵan», - dep toqtaldy A. Qurmanova Májilistiń jalpy otyrysynda.

Budan bólek, depýtattar Kundelik.kz júıesiniń qaýipsizdigine kúmánmen qaraıtyndyǵyn aıtty.

 «Almaty qalasyndaǵy № 61 mekteptegi oqıǵaǵa toqtalsaq, sol kezde belgisiz bireýler elektrondy kúndelikterde birneshe oqýshynyń avatarkalaryn ózgertken. Osy arqyly bul jaǵdaı oqýshylardyń jeke málimetterin qorǵaý qajettigin kórsetti», - dedi ol.

Sonymen qatar depýtat mınıstrlik ókilderi osyǵan deıin bul júıege ata-analardyń erikti ári aqysyz túrde qatysatyndyǵy týraly birneshe ret jarıalaǵanyn sóz etti. Onyń aıtýynsha, shyn máninde Kundelik.kz. qyzmetteriniń bir bóligi ǵana aqysyz, al ata-analarǵa qajetti birqatary aqyly bolyp otyr.

«Pedagogtar Kundelik.kz-ti engizý máselesinde saıtqa adamdardyń kirýine baılanysty QR BǴM tarapynan júrgiziletin monıtorıńke kóńili tolmaıdy. Monıtorıń negizinde qoldanýshylardyń belsendigi boıynsha óńirlerdegi bilim berý mekemeleriniń jarıa emes reıtıńi qurylady. Sondyqtan da pedagogtarǵa ata-analardyń logınderi men qupıasózin jınaýǵa týra keledi. Osy oraıda muǵalimder olardyń atynan paraqshalarǵa kúndelikti kirýge májbúr. Keıbir mektepterde ınternet tek bir kabınette ǵana qosylǵan, bul turǵyda muǵalim sabaqtan keıin taǵy 2-3 saǵat ýaqytyn elektrondy jýrnalǵa jumsaıdy. Al eger bul sharalardy oryndamasa, mektep ákimshiligi tarapynan sógis alýy múmkin», - deıdi depýtat.

Onyń paıymynsha, negizi jańa júıe pedagogtarǵa júktemeni azaıtýy tıis edi, biraq is júzinde muǵalimder eki jumys jasaýǵa májbúr. Iaǵnı, jýrnaldardyń birneshe túrin toltyryp, saıtqa kiretinderdiń sanyn arttyrý turǵysynda balalar men ata-analar atynan paıdalanýǵa artyq ýaqyt jumsaıdy.

«Kezekti ret barlyq júkteme men jaýapkershilik qazaqstandyq muǵalimderge júktelgen. Jalpyǵa birdeı sıfrlandyrý jaǵdaıynda atalǵan baǵdarlamany jetildirý qajettigi aıqyn baıqalyp otyr. Sondyqtan Kundelik.kz saıtyna kirý kórsetkishine túrli monıtorıń pen reıtıńter tájirıbesin joıyp, joǵaryda atalǵan problemalardy qarastyrýdy suraımyz. Sonymen qatar «Sıfrlyq Qazaqstan» baǵdarlamasy aıasynda bul problemalardy sheshýdiń sharalaryn qabyldaýdy usynamyz», - dedi Aızada Qurmanova. 

QazAqparat

---