InfoHub Logo

Qazaqstanda joǵary bilim bar adamdardy kóbirek daıarlaýǵa ekpin qoıylady. Bul týraly Bilim jáne ǵylym vıse-mınıstri Ashat Aımaǵambetov málim etti.

«Qazirgi ýaqytta Mınıstrlik atqaryp jatqan trendterge toqtalsaq, birinshiden,  ol bilimge qoljetimdilikti keńeıtýge qatysty. Bizdińshe, joǵary bilim eksklúzıvti bolmaýy kerek, ıaǵnı «qansha kerek, tek sonsha daıyndaý» sekildi burynǵy kózqarastan alshaqtaý qajet. Qazirgi zamanda bizge joǵary bilim bar adamdardy kóbirek daıarlaýǵa tıispiz. Sebebi ol adamı kapıtalǵa qatysty qoıylyp otyrǵan talaptarǵa sáıkes keledi. Sondyqtan elimizde bilimdi adamdar úlesi basym bolsa, bul óz kezeginde memleketke kóbirek paıdasyn tıgizedi», - dep atap ótti vıse-mınıstr joǵary bilim berý júıesin damytý taqyrybynda Astanada ótken dóńgelek ústel otyrysynda.

Onyń sózine qaraǵanda, ótken jyly 10 myńǵa jýyq orynǵa memlekettik bilim berý tapsyrysy artty. Osy oraıda vedomstvo bul baǵyttaǵy jumysty jalǵastyrýǵa nıetti.

«Taǵy bir baǵyt joǵary bilimdi ınternasıonaldandyrýǵa baılanysty. Búginde bul sala mańyzdy trendterdiń biri bolyp otyr. Osy oraıda Qazaqstannyń júıesin bilim berý habyna aınaldyrý maqsaty qoıylyp otyr», - dep toqtaldy Ashat Aımaǵambetov.

Bul turǵyda Úndistan, Qytaı, Túrkıa, Pákistan, Mysyr, Reseı jáne basqa elder úshin Qazaqstannyń bilim berý júıesin habqa aınaldyrý baǵytyna nazar aýdarylyp otyr. Sondyqtan elimizdegi sheteldik stýdentterdiń úlesin qysqa merzimde eki paıyzdan bes paıyzǵa deıin arttyrý jospary bar.

QazAqparat

---