InfoHub Logo

Bir joly Maqash pravıteldiń úıine Adaı elinen Janturǵan bı kele qalady. Maqash Janturǵanǵa sálemdeskende bylaı depti:

— Áı, Janturǵan, bul qazaqtyń atadan balany shırek kem týady deıtini bar. Osy ne sózi? Qazaǵym sonda meni de ákesinen shırek kem týdy dep aıta ma eken? — dep kúlipti.

— Oıbaı, Maqash-aý, jurt seni ákesinen shırek emes, put kem týdy dep júr ǵoı.

Janturǵannyń myna sózin estigen Maqash ot basqandaı yrshyp túsedi.

— Munysy qaı mazaǵy? Men ony eki túrli pán oqydym. Patshadan shen alyp, eki birdeı okrýgty ýysymda ustap otyrmyn. Myna jurt aýzymnan shyqqan sózimdi sanap tyńdaıdy. Al ákem Sholtyr tym qurysa qaǵazǵa barmaǵyn da basa bilmeıtin nadan adam edi. Sonda jurttyń meni ákemnen put kem týdy deýiniń qaı kelisi bar?

— Sabyr et, Maqash, — depti sonda Janturǵan bı. — Ákeń Sholtyr óz ákesi Bekpenbet bı ólgende Sasyqtaýda sansyz jylqynyń jaly men qoıdyń jabaǵasyna ılep, tamdy óz qolymen salǵan eken. Sen sony kóre turyp, ákeń Sholtyr ólgende maldyń qıyna ılep tam saldyrǵanda óziń eńkeımediń de. Ákesinen shırek emes, put kem týdy deıtini sodan shyǵar...

* * *

Birde erteńgilik Janturǵan men Bekturǵan boı sergiteıin dep qonǵan úılerinen syrtqa shyqsa, eshqandaı qonaqasy qamy baıqalmaıdy. «Myna Maqash, bizdi keshegi soıǵan bir toqtysymen jóneltpek qoı, shamasy. Biz bolsaq, ol kelgende qaradaı shabylamyz. Munysy qalaı bolǵany?» — dep oılaıdy ekeýi. Aqyry, aqyldasa kelip, qastaryndaǵy atqosshysyna:

— Úıge kir de, oramal jaıyp, pyshaǵyńdy shıqyldatyp qaıraı ber. Maqash birdeńe dese, jaýabyn ózimiz beremiz, — deıdi.

Atqosshy bulardyń aıtqanyn istep, oramal jaıyp jiberip, pyshaǵyn shıqyldatyp tynym tappaǵan soń úı ishinde árili-berili qydyryp júrgen Maqash:

— Pyshaǵyn qaırap, myna ıt kimniń qulaǵyn keseıin dep otyr? — dep surapty.

Osyny kútip turǵan Janturǵan ile-shala:

— Maqash-aı, seni men meniń qasyma qaıbir toıǵan ıt eredi dep eń, bir ash-taǵy, — depti.

Maqash sózden jyǵylǵanyn sonda bir-aq bilipti.

---