InfoHub Logo

Kóktem keldi. Qys yzǵary qaıtyp, jerdiń baýyry jylyp, barlyq tirshilik ıesi qýanyshqa bólengendeı. Aqqaıyń ananyń da búr-kursaqtary shetinen ashylyp, japyraq jaıýda. Tek eń kenje búrshik qana asyǵar emes. Sirá, áli dúnıe esigin ashar ýaqyty kelmegen-aý. Biraq kúnnen-kúnge mol túsip, jylýy kúsheıgen kún sáýlesi qoıa ma? Oınaqshyp júrip, kishkentaı búrshikti qytyqtap, búr-qursaqty jaryp shyqpasyna qoımady. Erine basyn kótergen Japyraq myna keń dúnıeniń sulýlyǵyn kórip, qalaı jaıylyp ketkenin sezbeı qaldy. Qandaı ádemi edi, tabıǵat! Kók aspan she?! Tap-taza, tup-tunyq! Japyraq jan-jaǵyna kózi toımaı qaraýmen boldy. Qustardyń saıraǵan únine qulaq túrdi. Óz baýyrlarymen Aqqaıyń ananyń kórkin toltyryp, samal jelmen terbele baqytty bir kúı keshti. Jaz boıy keıde aq jaýynǵa malynyp, keıde aptap ystyqqa urynsa da, ol myna myna ómirdiń qyzyǵyna toımady. Osylaı jaıqalyp tura beretinine kámil sendi. Biraq, bir kúni kún sýyta bastady. Japyraq burynǵydaı emes, kúnniń jylýyn az sezine bastady. Jaýyn jaýǵannan keıin, birtúrli boıy muzdaıtyndaı. Baýyrlary da, kórshi tal-terekterdiń japyraqtary da sary, qońyr, qyzyl túske boıalyp, burynǵy jap-jasyl álem kóz aldynda joǵalyp barady. Aspandy jıi bult torlaıtyn boldy. Aqqaıyń anadan tabıǵattyń tosyn ózgerisi jaıly surap edi, ol:

— Balapanym, bul tabıǵattyń zańy... — dep qysqa ǵana jaýap berdi.

Japyraq jerge saýyldap tógilip jatqan basqa japyraqtardy kórgen saıyn kóńili qulazyp ketedi. Ásirese kúzdiń sýyq jeli soqqan kúni, aǵashtar qatty jutań tartyp qalady. Osynyń bári kóz aldynda ótip jatqan Japyraq ta bir kúni úzilip túser sáti kelerin ishteı sezip, jylaǵysy kelip ketti. Jazdy saǵyndy.

Búgingi soqqan jel erekshe kúshti boldy. Keıbir aǵashtar sońǵy sanaýly japyraqtarynan aıyrylyp, jalańash kúıge tústi. Japyraq ta Aqqaıyń anadan aıyrylǵysy kelmeı qansha tyryssa da, doly jel ony qańbaq qurly kórmeı julyp aldy. Kózin tars jumyp alyp, uıytqyǵan jelmen aınala quldılap kele jatqan Japyraq, kenet ózi oılaǵan sýyq jerge emes, jyp-jyly búldirishin alaqanǵa kelip tústi.

— Apa, apa! Qarańyzshy, qandaı ádemi japyraq. Sap-sary altyn sıaqty! — degen kishkentaı qyz balanyń daýsynan kózin ashyp qaldy. Bul birinshi synypqa jańa aıaq basqan Káýsar bolatyn. Apaıy kúzgi japyraqtardy jınap, dápter arasyna salyp, keptirip kelýdi tapsyrǵan edi. Anasy ekeýi sol tapsyrmany oryndaýǵa birge shyǵyp, ár túrli japyraqtar jınap júrgen.

Kepken japyraqtardan jasalǵan «Kúzgi dala» japsyrmasy Káýsardyń apaıyna unaǵany sonsha, ony kórmege ilip qoıdy. Barlyǵy oǵan qyzyǵa kóz tastaıdy. Ásirese, dál ortasynda turǵan Aqqaıyńnyń altyndaı sary Japyraǵy erekshe. Ol jan-jaǵyna qaýmalaǵan kishkentaı oqýshy ul-qyzdarǵa qýana qarap turdy.

---