InfoHub Logo

Bekbolat anasynyń týǵan kúnine ne syılaryn bilmeı, kádimgideı-aq qınalyp júrdi. Anasy ne nárseni unatýshy edi? Ári oılap, beri oılap, aqyry tapqan sıaqty.

Birde anasy Bekbolattyń jeıdesindegi úzilgen túımeni kórip: «Myna túımeń di qadap alý qolyńnan kelmeı me? Bir ózim qaı jaǵyna jetemin. Osyndaı usaq-túıekpen júıkemdi juqartpasań da bolady ǵoı», — dep renjigen.

Bekbolat: «Túıme qadaıtyn qyz emespin ǵoı», — dep qalǵan. «Dastarqan dámi mynaý qyzdardyń, mynaý uldardyń taǵamy dep bólinbeıdi ǵoı. Úı sharýashylyǵyna kelgende nege daralana qalasyń?». Muny aıtqanda anasynyń daýysy diril dep, kemseńdegendeı boldy. Bekbolat sonda anasyn qatty aıaǵan edi. Sodan beri úıde analary joqta qolyna ıne-jip alyp, maıda-shúıde tigýdi úırenip júrgen. Bekbolattyń esine osy jaı tústi de, bir kishkene aq mataǵa besalty qara túımeni eki jol etip qadap qoıdy.

Bekbolat anasynyń týǵan kúnine óz saýsaǵynan shyqqan ónerin usynǵan. Anasy Bekbolat oılaǵandaı emes, syılyqqa keremet rıza boldy:

«Mine, munan artyq syılyqty oılap tabyńdarshy! Ananyń aıtqan aqyly dalaǵa ketpeı, balasy nyń sanasyna jetkennen artyq ne bar?! Biraq balam ıne-jipke saq bolǵaısyń, ony birden yrqyńa kóndirip alý ońaı emes. Asyp-sasyp kez kelgen jerge tastap ketip júrme».

Anasynyń týǵan kúnine jınalǵan qonaqtar da syılyqty jer-kókke syıǵyz baı maqtady. Dastarqan basyndaǵy kúlki men shattyqqa toly otyrysty kórgen Bekbolatqa taǵy bir oı tústi. Qonaqtar tarqaǵan soń, anasynyń qasyna keldi:

—  Ana, osy Bıken ájeıdiń týǵan kúni bar ma?

—  Árıne, ár adamnyń týǵan kúni bolady.

—  Endeshe ol kisi nege týǵan kúnin toılamaıdy?

— Bul keıinirek kelgen dástúr, ol kisilerdiń tusynda joq edi, sonan soń eskerilmeıdi-daǵy...

Erteńine Bekbolat Bıken ájeıdiń úıine bardy. Ájeı ádettegideı: «Á, Bekentaı, kelip qaldyń ba? Tórlet. Qazir ekeý miz áńgimelesip otyryp, shaı isheıik», — dep, qýana qarsy aldy. Bekbolat ájeıdiń úıine jıi baratyn. Aýyl balalarynyń ishinde ájeıge kóbine-kóp qol ushyn berip, kómek kórsetetin de Bekbolat. Ájeıdiń áńgimesinen buryn óz saýalyn aıtty.

—  Áje, sizdiń týǵan kúnińiz qashan?  — Bıken ájeı qarqyldap kúlip aldy da:

— Ol jaǵyn qaıdan bileıin, qaraǵym? Dúnıege senderdiń jazý syzýlaryńnan buryn keldik qoı, — dedi.

— Áje, onda sizdiń týǵan kúnińiz segizinshi naýryz bolsyn, — dedi Bekbolat.

— Ol jaǵyn óziń bil, qaraǵym. Ájeńniń týǵan kúniniń bıligi seniń qolyńda. Kel, shaı isheıik, — dedi Bıken ájeı, Bekbolattyń sózine mán bermeı. Óıtkeni bul ańqyldaq balanyń ańǵal minezderiniń biri dep qaraǵan.

Segizinshi naýryz kúni keshkisin Bekbolat, ákesi, anasy jáne Bekbolattyń dostary Serik, Almajan, Aıgúl, Bolat syılyqtaryn qushaqtap, ájeıdiń úıine saý ete qaldy. Bıken ájeı qamzolynyń óńirin sıpalaı berdi. Kelgenderge kózin syǵyraıta uzaq qarady da:

—  Áı, Bekentaı-aı, sen bolmaǵanda osyndaı baqytty kúndi kórer me edim! — dep, erini kemseńdep kózine jas aldy. Sol kúnnen bastap Bıken ájeıdiń týǵan kúni segizinshi naýryz dep esepteletin boldy.

---