InfoHub Logo

Suńqar álsirep qalǵan-dy. Qanat-quıryǵy seldireńki tartyp, sıqy kete bastaǵan edi. Dalp-dalp sabalanyp zorǵa kóteriledi kók júzine. Bıikte emin-erkin samǵaıtyn kúnder kelmeske ketken. Kezinde qaz-úırekke maıdan ashyp, «qyrypsal» atanǵan qandy kóz jyrtqyshqa búginde ózegin jalǵaýdyń ózi muń. Boıyna shyr bitpeıtin uzyn sıraq tyrnanyń jasyǵyn mise tutpaı, qarasha qazdarǵa qudıyp, dýadaqtardy bólshekteıtin er suńqar óleksege aldanǵan quzǵynnyń keıpinde edi. Kól jıegine shyǵyp qalǵan balyqty shuqıdy. Qanaty ketilgen qustardy torýyldaıdy. Odan soń sýǵa túsip dem alýǵa kelgenderdiń qaldyq taǵamdaryn shoqıdy. Jumyr bastylarda toıym joq. Jemeıtinderi joq ózderiniń. Sóıtedi de, qanatty jyrtqyshtardy jazǵyrady. Qudaıǵa qaraǵan aqjúrek ekenin dáleldep bere qoısynshy? Muny osyndaılyq kiriptarlyqqa dýshar etken solar. Tordan sytylyp shyǵamyn dep jantalasqanda, topshysyn zaqymdap, qanatyn syndyryp aldy. Sodan bylaıǵy tirliktiń sıqy mynaý. Qaıran kelmeske ketken dýly kúńder-aı! Qus bazaryna aınalǵan kógildir kólge qıannan kep kılikkende, aıdynnan kóterile ushqan qustardyń qıqýynan qulaq tunyp, ábigerge túsip, jan ushyrǵandaǵy dańǵaza shýylyna qyby qanyp, órlene túsetin de, qara bulttaı tutasqan qustar shoǵyryna quıar edi. Tepkinine ushyrap, doda-dodasy shyqqan qaz-úırek jerge top-top etip túsip jatar edi.

Sóıtken bolat topshyly qansheńgel qyran ólimshi búginde. Jaraly jyrtqyshtyń áli de bolsa birqaǵary bar. Kóziniń oty sóne qoımaǵan-dy. Qanat sermesi burynǵydaı bolmaǵanymen, syrt tulǵasy «Áı, anaý, suńqar emes pe?» degizerdeı jınaqy edi. Sodan da adamdar buǵan ish tartady. Syrtynan baıqatpaı kep sýretke túsirip alady. Dúrbimen tamashalaıdy. Dalbalaqta,p jer baýyrlaı sabalanyp ushqanyn kórgende aıaýshylyq bildirip, bas shaıqasady. Aıaıdy jaraly suńqardy.

Ózegi talǵan ol jıekte qalyp ketken taǵam qaldyqtaryn apash-qupash shoqı bastaǵan-dy.

Sýdan shyǵa kelgen kólbaqa:

— Neni shoqyp jatsyń-eı, shaqaraq neme?! — Suńqarǵa qısynsyz soqtyqty. — Seni de qus tektisi deımiz-aý. Qaldyqtan únem aıyrǵanyń estir qulaqqa uıat emes pe? Saǵan jarasa ma osy kúıbeń? Qarashy maǵan! Ien kóldiń biregeıimin. Ne ishemin, ne jeımin demeımin. Mol qorek aýzymnan alady. Maǵan jáne sýdaǵy barsha jándikter tájim etip bas ıedi. Quldyq uryp qurmetteıdi.

Suńqar shydamaı ketti. Sańq etkende, baqa shoshyp qaldy. Tostaq kózi baǵjıyp qoryqqandyǵy sonshalyq — zár shyǵaryp jiberdi.

— Áı, jalpaq bas, shı but neme! Ne dep shaǵyp tursyń?! — dedi suńqar ýyttanyp. — Saǵan bul sózdi aıttyryp turǵan túpsiz tereń tuńǵıyq-aý. Esińde bolsyn, seniń bolymsyz baǵyńnan meniń sorym artyq.

Baqanyń úni shyqpaı qaldy.

Jaraly suńqar ashshy shańqylǵa basqanda tebirengen kól tolqyny kóbiktenip, týlap jatty.

---