InfoHub Logo

Kózi uıqyǵa barǵansha ájesine qoıarda-qoımaı, ertek aıtqyzatyn Aıdananyń kúndegi ádeti edi. Búgin de:

— Áje deımin, ertek aıtyp bershi! — dep uıyqtamaı qoıdy.       

— Erte-erte zamanda, eshki júni bórte zamanda, túıeniń quıryǵy kelte zamanda, qyrǵaýyly qyzyl eken, quıryq júni uzyn eken, — dep bastady ájesi ertegini. — Úıleri kórshi otyratyn tatý-tátti úsh jigit bolypty.

 — Olar ne qypty? — dedi Aıdana erteginiń sońyn uqqansha taǵatsyzdanyp.

— Aıtamyn ǵoı. Úsheýi urpaqtaryna mura qaldyrý týraly kelisipti. Birinshi jigit «Men aqsha jınap bankke sala beremin» depti. Ekinshi jigit «Men qora-jaı saldyramyn» depti. Úshinshi jigit «Men balalaryma óner úırete beremin» degen eken.

— Sosyn ne bopty, áje?

— Talaı jyldan keıin úsh dos biriniń sońynan biri dúnıeden ótipti.

— Onan keıin she?

— Onan keıin olardyń balalary úlkeıipti. Úıli-barandy bolypty. Bir kúni jer betin topan sý qaptapty.

— Sosyn qaıtipti?

— Sonan keıin, óner úırengender apattan túgel aman qalypty.

Bir sátke oıǵa shomyp úndemeı qalǵan Aıdana:

— Áje, men de óner úıreneıinshi! — dep, uzyn kirpigi jıi-jıi qaǵylyp, shanaqty qoı kózderi jypylyqtaı bastady.

— Úırenesiń, kókem! — dedi ájesi ájimdi alaqanymen nemeresiniń basynan sıpap. — «Ónerli ólmeıdi» degen sol ǵoı, balam.

— Áje, sen ertip barǵan bıik úıden oqımyn. Kóp táteler oqıdy eken ǵoı, sol mektepte? Ál-Farabı atanyń tastan jasaǵan músinin kórdim.

— Ál-Farabı atalaryń — kóp oqyǵan, kóp biletin adam. Sol kisiniń atyndaǵy mektep — sen kórgen bıik úı. Keıin sol jerden oqısyń. Tiri bol, janym!

Aıdana basyn ájesiniń kókiregine súıep, qatty uıqy qysqandyqtan, qalǵı bastady...

---