InfoHub Logo

«Búgingi stýdent – erteńgi maman» dep jatady. Osy sózdiń údesinen shyqqan Qyzylorda qalasyndaǵy «Bolashaq» oqý ornynyń ustazdarynyń sol kezde, ıaǵnı saıys ótkizerde ózderiniń oqý ornyn pedagogıkalyq mamandyqtar boıynsha bitirgeli jatqan stýdentterine endigi jerde jas ustaz retinde qaraǵandyǵy da sondyqtan bolsa kerek. Ustazdary olardyń arasynda jas ustazdardyń saıysyn ótkizedi. Saıys barysynda saıysty uıymdastyrýshylar birneshe saıysker toptyń árqaısysynyń óziniń jas ustaz retindegi aıtatyn áni bolý kerek dep sheshim qabyldaıdy. Ol burynnan belgili ánge salynyp aıtylsa da bolady. Sol kezde osy saıystyń I ornyn enshilegen, kúni erteń-aq bastaýyshtyń muǵalimderi bolǵaly turǵan jas ustaz qyzdardyń bir toby ózderiniń jas ustaz retindegi ánin sol saıysta aqyn Bákir Tájibaevtyń óleńine jazylǵan Eskendir Hasanǵalıevtiń «Stýdentterdiń qoshtasý áni» ániniń áýenine salyp oryndaǵan-dy:

Bilimniń gúlin biz
Jınadyq tańdarda.
Qol sozdyq búgin biz
Ustazdyq armanǵa.

Alaý ot jaǵamyz
Shákirttik kóńilge.
Qanatty qaǵamyz
Ustaz bop ómirge.

Q-sy:

Kóriner qıadan
Arman jol jalǵaıdy.
«Bolashaq» uıadan
Jas ustaz samǵaıdy.
Osynaý túlekti
Mektebi tosady.
Terbetsin júrekti
Ustazdyń osy áni.

Keleshek ósedi,
Oılaımyz Otandy.
Shákirt ek keshegi,
Jas ustaz atandyq.

Senemiz búginnen –
Alamyz asqardy.
Ustazdyq bilimmen
Erteńim bastaldy.

Osyndaı ustazdyq bilimmen erteńi bastalǵan ustazdyń biri Qojabaqy aýylyndaǵy №25 mekteptiń bir kezgi jas mamany Jaqsygúl Bekjanova edi. Jaqsygúl Qorqyt Ata atyndaǵy Qyzylorda gýmanıtarlyq ýnıversıtetin 1997 jyly geografıa jáne bıologıa mamandyǵy boıynsha úzdik bitirgen. Eger Jaqsygúl Bekjanovanyń ustaz retindegi jumystaryn kórsetý úshin 2000 jylǵy naýryz aıynda jas ustazǵa arnap «Jas ustazǵa tilek» óleńi jazylsa, onda №25 mekteptiń jas ustazy osy az ǵana jyldardyń ishinde-aq ózin ustazdyq jumysta dál solaı kórsete alǵandyǵy. Eger mektep shákirtiniń bilim jolda ózderi oqyp júrgen pánnen pán olımpıadasyna qatysýy mańyzdy bolsa, onda Jaqsygúl óz sabaqtaryn izdenispen ótkizýmen qatar, oqýshyny pán olımpıadasyna daıyndaýdyń da sheberi bolǵan ustaz edi. Onyń pán olımpıadasyna qosqan shákirtteri júldesiz qaıtpaıtyn:

«Óz oıyńmen aqyl-bilim ólshettiń,

Shákirtti de izińe ergen kórsettiń...»

90-jyldardyń aıaq kezi – qoǵamǵa «XXI ǵasyrdyń muǵalimi qandaı bolmaq?» degen suraqty qoıǵan kezeń. Bul suraq sol kezde aýyl mektepterinde de talqyǵa túsip jatty. Keıin ýaqyt óte kele áý basta №25 mekteptiń jas ustazynyń shyǵarmashylyq turǵydaǵy eńbegin baǵalaýǵa arnap 2000 jyly jazylǵan «Jas ustazǵa tilek» óleńine endi ol búgingi ǵasyr jas ustazdaryna da arnalsyn degen nıetpen taǵy da óleń shýmaqtary qosylǵan-dy:

«Jas – iske» dep bilim jolǵa sen keldiń,
Jańa zaman baǵdaryn tez meńgerdiń.
Ǵasyryńnyń quraly da shyndyǵyn
Saǵan ashty – qolyńda oınap tur búgin.

Shyndyǵynda, mamanysyń sen istiń,
Qazirden-aq tájirıbeńdi bólistiń.
Sen búgingi jas ortanyń ókili,
İzdenýiń – jemisińniń kepili.

Tabystaryń tabyspenen jalǵasty,
Ár shákirtiń ǵylymmenen syrlasty.
Sen olarǵa bilim nur bop ashyldyń,
Ustazysyń alǵa aparar ǵasyrdyń.

Baǵdaryna aınala alǵan balanyń,
Jas ustazǵa úmit artty zamanyń.
Óziń jaıly beriletin baǵa kóp,
Sen búgingi naǵyz ustaz – pedagog!

Atalǵan «Jas ustazǵa tilek» óleńine arqaý bolǵan bir kezdegi №25 mekteptiń jas mamany, keıingi Qazaly qalasyndaǵy №17 mekteptiń ustazy Jaqsygúl Bekjanova jaıynda 2017 jyl 16 aqpan kúngi «Qazaly» gazetinde jarıalanǵan №17 mekteptiń qosymsha bilim berý pedagogy A.Mańǵutovanyń mektep boıynsha marapattaý týraly maqalasynda bylaı deıdi:

«Jyl kóshbasshysy» baǵamyn oblystyq semınarda «Úzdik joba» baǵamyn ıelengen, jyl saıyn bilim olımpıadasynda oqýshylary júldeli oryndardy qanjyǵasyna baılaǵan geografıa pániniń muǵalimi Bekjanova Jaqsygúl ıelendi».

 Jas ustazǵa tilek

Talabyńmen tanyp bilgen ilimdi
Qoldandyń da ustaz boldyń búgingi.
Júregińdi bilim nurǵa bıletip,
Júrsiń daǵy shákirtke syr úıretip.

Jalqaýlyq pen erinshektik tanytpaı,
Jaýhar bilim izdetesiń jalyqpaı.
Jeteletip izgilikke qadamyn,
Júregine bilim quıdyń balanyń.

Kelmeseń de jasqa daǵy kemeldi,
Etken eńbek kópshilikke elendi.
Tek ózgeler qyzyǵýmen qaraıdy,
Báıge synda shań qaptyrdyń talaıdy.

Óz oıyńmen aqyl-bilim ólshettiń,
Shákirtti de izińe ergen kórsettiń.
Bile bilsek, uǵa bilsek jaıyńdy,
Kópke eńbegiń qazirden-aq jaıyldy.

«Jas – iske» dep bilim jolǵa sen keldiń,
Jańa zaman baǵdaryn tez meńgerdiń.
Ǵasyryńnyń quraly da shyndyǵyn
Saǵan ashty – qolyńda oınap tur búgin.

Shyndyǵynda, mamanysyń sen istiń,
Qazirden-aq tájirıbeńdi bólistiń.
Sen búgingi jas ortanyń ókili,
İzdenýiń – jemisińniń kepili.

Tabystaryń tabyspenen jalǵasty,
Ár shákirtiń ǵylymmenen syrlasty.
Sen olarǵa bilim nur bop ashyldyń,
Ustazysyń alǵa aparar ǵasyrdyń.

Talaptyǵa taǵylady dúıim syn,
Dos súıinip, dushpandaryń kúıinsin.
Jaıa bersin qanat qaǵyp órkeniń,
Osy baqtyń jyǵyp alma jelkenin!

Baǵdaryna aınala alǵan balanyń,
Jas ustazǵa úmit artty zamanyń.
Óziń jaıly beriletin baǵa kóp,
Sen búgingi naǵyz ustaz – pedagog!

---