InfoHub Logo

Ár adam ómirin jaıly ári yńǵaıly etkisi keledi. Keń úı, jańa avtokólik, jumsaq tósek, jyldam isteıtin kompúter. Órkenıettiń bul ıgiliginen bas tartý aqymaqtyq bolar edi.

Alaıda bárine qol jetkizdim, ómirim – jumaq deıtinder ýaqyt óte kele mundaı jaıly ómirdiń ózindik qaýiptiligi bar ekenin túsine bastaıdy. Qaı jaǵynan qaýipti jáne odan nege alshaq bolýymyz kerek?

Yńǵaıly, jaıly ómirdiń esh jamandyǵy joqtaı kórinedi. Siz ózińizdi jaıly sezinesiz, táýekelge barýdyń esh qajeti joq, jumysyńyz júrip jatyr, eshteńeni ózgertýdiń qajeti joqtaı kórinedi. Degenmen siz ózińizdi tolyqqandy baqytty sezinbeıtin shyǵarsyz, nemese 100% qanaǵattanbaıtyn shyǵarsyz, solaı emes pe? Solaı.

Kóbine jaıly aımaq adamnyń óz-ózin aldaýynan, ıllúzıasynan týyndaıdy. Búgingi jaǵdaıyńyzǵa úzdik balama joq dep oılaısyz, osy jaǵdaıdy jasaý úshin tym kóp eńbek ettińiz, birdeńe ózgertýge tym kesh deısiz. Siz yńǵaıly bolsa da, bir jerge toqtaısyz da, ómirińizdegi tamasha múmkindikterge joq deısiz. Jaıly aımaq jolyńyzdyń sońǵy aıaldamasyna aınalady. Nege olaı bolady?

Siz jumsaq bola bastaısyz

Jyly vanaǵa kirgen adammen birneshe mınýttyń ishinde ne bolady? Onyń boıyn jylýlyq bılep, ózin jaıly sezine bastaıdy. Al mundaı kúıdi uzaqqa sozatyn bolsa she? Durys, ol degradasıaǵa ushyraıdy. Bulshyq etteri pishinin joǵaltyp, biraz  ýaqyttan keıin ol júgirý turmaq, bir orynda tura almaıtyn bolady.

Biraq bul denege ǵana qatysty emes. Mıymyzben de dál osy proses qaıtalanady. Qıyn tapsyrmalardy oryndaýǵa qajetsizdik oılaý qabiletin, bilim alý qabiletin tómendetip, sheshim qabyldaı almaýǵa ákeledi. Siz kúndelikti bir aımaqta júrip-turatyn jáne bir ǵana tapsyrmalardy oryndap júretin qýyrshaqqa aınalasyz. Sonyń arasynda, ómirińizdiń qaı kezeńi siz úshin ónimdirek jáne shyǵarmashylyqqa toly boldy? Ol ýaqytty jaıly shaq dep aıta almaıtynyńyzǵa senimdimiz. Bireýler uıqysyz ótken stýdenttik shaqtaryn esine alady, basqalar shytyrmanǵa toly oqıǵalar men saıahattaryn, al úshinshileri – bárin basynan bastaý kerek bolǵan qıly kezeńdi.

Siz ómirlik maqsattaryńyzdan bas tartasyz

Ár adamnyń, jaraıdy, adamdardyń kóbiniń júrek túbinde ómirde qol jetkizgisi keletin maqsaty bolady. Bir qyzyǵy, ádette ol maqsattar qol jetimsiz jáne qıalı bolmaıdy. Biraq báribir bizge birdeńe kedergi bolady. Biz maqsatymyzdy keıinge shegere beremiz, al aınalańyzda jaıly aımaqtyń órkendeı berýinen ol tipti qol jetimsiz bolyp qalady. Sebebi bir ýaqytqa jyly vanadan shyǵyp, dalaǵa shyǵý qıyn ǵoı.

Siz ózińizdi tanı almaı ketýińiz múmkin

Adamnyń beti qıyndyqqa urynǵanynda ashylady degen pikir bar. Siz ómir boıy jaıly ortada ómir súrip, qolyńyzdan shyn máninde ne keletinin bilmeı ótýińiz de múmkin. Siz shynymen batyl ári ónertapqysh bola alasyz ba? Siz shynymen qaısarlyq tanytyp, shydamdy bola alasyz ba, álde sondaımyn dep oılaısyz ba? Jaıly aımaqtan shyǵyp, tym quryǵanda ózińiz úshin, shyn máninde qandaı adam ekenińizdi jáne múmkindikterińizdiń shegi qaı jerde ekenin túsinetin ýaqyt keldi. Nátıjesi sizdi tańǵaldyrmaı qoımaıdy.

Erte me, kesh pe jaıly aımaq kez kelgen adam úshin onyń damýyn tejeıtin jáne ómirdi sezimniń ótkirliginen aıyratyn faktorǵa aınalady. Ómirińizdiń eń qyzyqty sátterin esińizge alyńyzshy. Olardyń kóbi ádettegi ómirden tys áreketterdi jasaý kezinde bolǵan shyǵar? Jaıly aımaqtan shyqqan kezińizde boldy. Endi osyny nege qaıtalap kórmeske?

---