InfoHub Logo

Batýshy edi janǵa aıazdaı bir joǵy,
Shyndyq surap kóterildi ul qoly.
Serippe edi jyldar boıy jıyrylǵan,
Qatty seripti, aıanbady bul joly.

Ol qatań rejımniń aldynda mundaı bolýy múmkin emes degen nárseni múmkin etti. Ol rejımdi sonysymen shoshyndyrdy. Onyń aty - Jeltoqsan.

Ol úreılendirip jiberdi. Komýnıstik ult saıasaty jeleýimen óz saıasatyn júrgizip jatqandardy. Boılarynda áli oıaý rýhtyń qany bar eken dep.

Ol yzalandyrdy. Shovınısik pıǵylda oılaıtyn jandardyń yzasyn týdyrdy. Teńdik suraǵysy keledi dep.

Ol úmit otynan bastalǵan edi. Júıe bizben sanasady dep. Bizdi tyńdaıdy dep.

Ol biriktirip turdy. Onyń aty - alań.

Ol shamdandyrdy. Sol kezdegi ámirshil-ákimshil júıeni. Kúsh qoldanýǵa májbúrmiz dep.

Ol kóńilderge jaryqshaq túsirdi. Sol qoǵamǵa ózderi de senetin jas urpaqtyń senimin taptady. Ne úshin bulaı etedi dep. Biz de osy qoǵamnyń teń quqyqty múshesi emespiz be dep.

Ol shıryqtyrdy. Bıikte turǵan jandardyń ózderimen sanaspaǵandyǵy úshin. Sózderin tyńdamaǵandyǵy úshin.

Ol ashyndyrdy. Tushshy etine ashshy taıaq kelip tıgende.

Sonan soń qarsylyǵyn týǵyzdy. Rejımniń shynaıy bet-beınesin kórgende. Endi aıanyp qalar eshteńe joq dep.

Onyń aty - Jeltoqsan.

Jeltoqsan kóz jetkizdirdi. Ult jolyndaǵy qandaı da bir kúrestiń qıyn da kúrdeli joldan ótetindigine.

Mańyzyn qaldyrdy. Bul sol kezde qıyn bolsa da, olar "biz de bir elmiz" dep bir alańda, bir daýyspen ulttyq múddesin surap tura alǵan edi. Jeltoqsan osynysymen qasıetti.

Olar mindetin ótedi. Óz dáýirinde, óz kezeńinde.

Olardy shegindirdi. Biraq jeńilgen joq. Óıtkeni olar ádildik suraǵan edi.

Ol tarıhı mańyzdy sıpatqa ıe boldy. Aldyńǵy dáýirdegi kúrestermen úndesip jatqandyǵy úshin.

Ol bolashaqqa jol saldy. Odan keıin kelgen Azattyqtyń súrleý-soqpaǵynyń bir taramy Jeltoqsannyń da enshisinde jatyr. Ult jolyndaǵy barlyq qasıetti kúresterdiń tireler soqpaǵy - Azattyq.

Ol sanany jańǵyryqtyrdy. Qoǵamdy basqasha oılaýǵa májbúr etti. Olar osylaı etýge ıtermelegen óz qoǵamynyń alǵashqy qarlyǵashtary edi. Olar - tek ulttyq múdde ǵana emes, demokratıalyq úderisterdiń de soqpaǵyn salýshylar.

Ol ulttyq sanaǵa serpilis ákeldi. Ár tarapta ómir súretin jandar olardyń qasiretine kózi jetkende birdeı jylady. Olardyń sol kezdegi alańǵa tamǵan kóz jasynyń qaıǵysyn birdeı sezindi. Bir kezde alańda tek albyrt jastar ǵana tursa, endi óz sanasynda olarmen birge tutas ult turdy. Jeltoqsan ult sanasyn tutastandyryp jiberdi. Ol osyǵan qyzmet etti.

Jeltoqsan keıingi urpaqqa taǵylym bolyp keldi.

Qurbandarǵa taǵzym.

Jeltoqsan oqıǵasyna - 30 jyl.

Bolsa da kóp ómirde jol aınalma,
Tura aldy olar sonda ashyq maıdanda.
Taǵdyrymen, tarıhymen bir ulttyń,
Bolmaıdy eken ǵumyr boıy oınaýǵa.

Jeltoqsan osyny dáleldedi. Al arada 5 jyl ótkende taǵy da jeltoqsan aıynda qazaq ultynyń táýelsiz memlekettiliginiń tarıhy bastaldy.

---