InfoHub Logo

Qazirgi tańdaǵy máselelerdiń biri — qoǵamdaǵy sybaılas jemqorlyq. Osy keleńsiz qubylystyń údep bara jatqany urpaq tárbıesine zıan ákeletini bárimizdi alańdatady. Bul máselege tereńirek úńiletin bolsaq, sybaılas jemqorlyq el bolashaǵyna, ulttyq qaýipsizdikke úlken zıanyn tıgizedi. Iaǵnı, osy keleńsiz qubylyspen kúresý barsha halyqtyń aldynda turǵan ortaq másele ekeni aıqyn.

Sybaılas jemqorlyq áleýmettik - ekonomıkalyq damý, naryqtyq ekonomıkany qurý ınvestısıalar tartý prosesin baıaýlatatyn jáne demokratıalyq memlekettiń saıası jáne qoǵamdyq ınstıtýttaryna keri áser etetin, eldiń damý bolashaǵyna aıtarlyqtaı qaýip tóndiretin qubylys. Elbasy bıylda «Qazaqstan halqynyń ál-aýqatyn arttyrý - memlekettik saıasattyń basty maqsaty» atty óziniń Qazaqstan halqyna Joldaýynda «demokratıalyq qoǵam jaǵdaıynda qylmys pen sybaılas jemqorlyqqa qarsy kúres erekshe mánge ıe bolady» dep atap kórsetti. Iaǵnı bul memlekettiń osy jaǵymsyz qubylysty joıý baǵytyndaǵy keshendi jáne júıeli kúres júrgizý saıasaty jandanyp, ári qaraı jalǵasyn tabady degen sóz.

Sonymen qatar sybaılas jemqorlyqpen pármendi kúresý úshin halyqtyń quqyqtyq saýatsyzdyǵyn joıatyn, quqyqty túsindirý jumysynyń deńgeıi men sapasyn arttyrý kerektiginiń mańyzy zor. Halyq ózderiniń quqyqtaryn, ózderine qarsy qandaı da bir quqyqqa qaıshy is-áreket jasalǵan jaǵdaıda qandaı is-qımyl qoldaný kerektiginiń naqty joldaryn tolyq bilýleri qajet. Konstıtýsıalyq tártipti qorǵaý, sybaılas jemqorlyqpen kúres aıasynda tıimdi, biryńǵaı jalpy memlekettik saıasat júrgizý, memleket pen azamattardyń ómir súrýiniń barlyq salalarynda sybaılas jemqorlyq pen onyń kórinisteri deńgeıin tómendetý, qoǵamnyń memleketke jáne onyń ınstıtýttaryna senimin nyǵaıtý búgingi kúndegi basty maqsat bolyp tabylady.

Sybaılas jemqorlyq - zaman aǵysymen birge ósip-órkendep, mol qarajat jáne qoǵamdyq básekelestik paıda bolǵan jerlerge tamyryn jaıyp, búgingi kúnge deıin joıylmaı otyrǵan keseldiń biri. Bul kesel damýshy elderdegideı bizdiń jas memleketimizge de orasan zor nuqsan keltirip otyr.

Sondyqtan sybaılas jemqorlyqpen kúresý barlyq Qazaqstan Respýblıkasy azamattarynyń azamattyq boryshy dep bilý kerek.

Ál-Farabı atyndaǵy Qazaq ulttyq ýnıversıtetiniń Qazaqstan tarıhy kafedrasynyń dosenti t.ǵ.k. Jumadil Mahabbat Toqtarqyzy

---