InfoHub Logo

...Bir baı bolypty. Ol kedeılenedi. Kúnderdiń kúninde óledi. Artynda azyn-aýlaq múlki, bir uly jáne bir túıesi qalypty. Sol túıe botalaıdy. Álgi ul botany satamyn dep jetelep júredi. Sóıtip júrgende bir baıdyń qyzy esiginiń aldyna shyǵyp:

— Áı, jigitim, andaǵy botańdy satasyń ba? — deıdi.

— Satam, — deıdi jigit.

Sóıtip, qyz botany satyp alyp, jeti jasqa kelgenshe asyrap baǵady. Til úıretedi, adamnyń tilin bildiredi. Qyz bilgish eken. Túıeniń óse kele qasıetti bolatynyn aldyn ala baıqaıdy. Túıe óte zor, alyp atan bolǵan eken. Ony el «túıeniń pili», al qyz «Erke atan» dep ketedi.

Endi qyzǵa bireý darıanyń ar jaǵynan kelip quda túsedi. Qyzdy uzatar kún keledi. Otyz kúı oıyn, qyryq kún toıyn jasaıtyn bolady. Baı qyzǵa qalaý salady:

— Qyzym, narǵa ne arttyraıyn? — deıdi.

Qyz aıtady:

— Ne arttyrýshy edińiz, ózińiz bilińiz, baısyz ǵoı. Artqy elińiz kúıingendeı, aldyńǵy elińiz súıingendeı arttyryńyz,— deıdi. Sonda baı jeti atanǵa júk arttyrady. Qyz ózi asyraǵan álgi Erke atanǵa kelip:

— Sen «qalyp baramyn» deme. Men darıanyń ar jaǵyna ótti-aý degende maǵan qaraı qash. Qash ta qýyp jet. Men ótip bolǵansha sen de jetesiń. Seniń sońyńnan qýady. Qýǵanda da qara jorǵamen qýady. Ol jetkenshe sen sýdan ót, — deıdi. Sonymen qyzdy uzatady. Jeti atanǵa «aldyńǵy elim súıinsin, artqy elim kúıinsin» dep jasaý-jabdyq artady.

Olar uzap ketkende, álgi Erke atan qashady. Sońynan qara jorǵamen qýady.

Erke atan sýdan ótip ketedi. Qara jorǵa baryp sýǵa tireledi de qalady.

Erke atan aman-esen sýdyń arǵy betine ótken soń, qyz júktiń bárin bir Erke atanǵa arttyryp, jeti atandy qaıyra sýdan ótkizip, sońyndaǵy eline aıdatyp jiberedi. Sondaǵy jeti atannyń júgin jalǵyz ózi kóterip, Erke atannyń joldyń jıegindegi jantaqty shalyp jep, jelip bara jatqany deıdi.

---